En châkawm Hualngohmun Vs Venghlui

LBS Suzuki 21st Inter Branch YMA Football Tournament chu vawiin hian ground paliah khelh a ni dawn a, match 12 inkhel awm turah Hualngohmun leh Venghlui inkhel tur chu en châkawm ber pawl a ni.

MSSC Ground, Muallungthuah chawhnu dar 2:30 hian an inkhel dawn a, team ṭha zawka ngaih Hualngohmun tan 'home advantage' a awm thei ang.

Venghlui hian Samlukhai penalty hmangin an hneh hram a, chutihrualin goal khung turin Lalrosanga an kawl. Hualngohmun erawhin Ṭhiak 16-0 in an sawp a, player hmuhnawm Vanlalthanga'n goal li ngawt a khung. An match hmasa bera an khelh dan leh an player neih dan thlirin Hualngohmun hi champion rinkai zingah an tel thei hial ang.

Engtin zel?

Vaivakawn hi inkhelh thiam veng tia sawi ṭhin a ni a, Mizo player lar Lalengmawia Ralte (Apuia) te awmna veng hian Hortoki an hmachhawn dawn. Hnahlan Jt hi team ṭha an ni a, Kulikawn West tan a harsa ang. Apuia hi India tan a inlan dawn avangin an veng tan erawh a inkhel thei dawn rih lo.

Tuithiang leh South Sabual te hian thawm an nei vut lo a, intum tawk viau tura ngaih a ni. Sairang Dinthar-in an khawtualah Mualkhang an mikhual dawn a, chak ngei an tum ang.

Lengpui lamah MPL club nei Bethlehem Vengin Rabung an hmachhawn dawn. Tuikual North-in striker ṭha Lalremruata an kawl a, Ramhlun Vengthar nena an inkhel tur pawh hian ngaihven a hlawh ang.

A hun sawn

CYMA Football organising committee-in Lammual leh 1st Bn MAP Ground-a alloment a neih hi tlai dar 4:00 thleng a nih avangin ground pahniha inkhelh hun thlak danglam hret a ni.

Ground pahniha match hmasa ber hi chawhma dar 9:30-ah ṭan zel a ni a, chhun dar 11:30-ah match hnihna khelh tur niin chawhnu dar 1:30-ah match hnuhnung ber khelh tura ruahman a ni thung.