Arsenal an la champion ngam lo deuh; Man City kutah EPL nomawi an hlan

Premier League champion chu Manchester City an ni - Arsenal erawhin hun rei tak hmahruaitu an nihna bak sawi chhunzawm tur an nei ta lo. Nizan khan Pep Guardiola nauten a zawna a vawi thum nan EPL nomawi an chawi.

Inrinni zan khan Mikel Arteta nauten beiseina chhete an la nei a, mahse Nottingham Forest an ngam loh avangin an beiseina a thamral. Nottingham hian Taiwo Awoniyi-a goal khat hmangin 1-0 in hnehna an chang.

Arsenal beiseina a thamral rual hian Nottingham Forest chu season thara Premier League khel zui turin an him chiang ta chiah thung - match 37 an khelh aṭangin an match khelh zat chiah point an hmu a, 16-na niin tla thei china awm Leeds United aiin point rukin an sang zawk.

Gunners manager Arteta chuan, "Manchester City hian champion an phu a, ka lawmpui bawk. Season tluanin an khel ṭha tluang thei a, chu chu keini chuan kan tlin ve lo," tiin amah zirtirtu Pep Guardiola leh a naute a lawmpui.

A thlawn mai maw

Beisei phak bakin Arsenal hian season bul an ṭan fuh, match 18 an khelh tlin khan Manchester City lakah point riatin an sang fal - April thla tir lamah pawh khan Citizens nena an inkar zau lam hi a la pangngai reng.

Mahse, boruak a sang ta! Hliamin a tlakbuak a, an hnungah Pep Guardiola nauten na lutukin an nawr a, an buai zuai ta a ni. An league match hnuhnung pariat aṭangin vawi hnih chiah an chak a, an beiseina a thamral zui nghal bawk.

Ni 248 chhung chu Premier League table chung berah an awm, mahse an champion ta si lo. English football inelna sang berah champion chuang si loa season khat chhunga hmahruai rei ber record chu an siam ta tho.

Nottingham lakah khan Gunners hi chak ni se la chuan, an chunga awm Man City tan champion nemnghet turin match khelh leh phawt a ngai ang. Mahse, North London club an tlawm avangin City tan Chelsea mikhual chu champion lawmna mai a ni tawh.

A tawk zo lo

Arsenal manager Mikel Arteta chuan, "Thla 11 chhung chu rim takin hna kan thawk a, a ṭha ber nih tumin kan elphak ve bawk - hun rei tak chhung chu Premier League hmahruaitu pawh kan ni thei ngei mai.

"Mahse, khang kan thil tihte kha champion nan a tawk zo si lo, hei hi football-in a ken tel thawnthu lungchhiat thlak chu a ni. Na hle mah se kan pai dam thiam a ngai a, ka naute chak lohna lai thuam chak dan ka hriat chhuah a ngai dawn," a ti.

Inelna boruak sang vanglaiin Man City chu a zawnin match 11 an chak thei a, he tih lai hian Arsenal erawh match riat aṭanga goal 11 chuahin vawi hnih chiah an chak - player mai bakah manager naupang leh tawnhriat nei tlem zawk a zuih.

Arsenal goalkeeper Aaron Ramsdale chuan, "Season ruk chhungin Man City hian vawi khat chiah champion loh an nei. Tun season chu an tih ṭhat chu thuhran ni se, keimahni tihsual kan tuar a ni," a ti a, an squad chhah tawk lo an tuar tih a sawi bawk.