Firmino thlah zanah Liverpool chak zo lo
Inrinni zan khan Roberto Firmino-a'n Liverpool tana Anfield-a a match hnuhnung ber a khel a, goal a khung bawk. Mahse, ngaihnawm taka tawp thei thawnthu hi a ngaihnawm tur angin a ngaihnawm phak lo - Liverpool chak zawh loh vang a ni.
Liverpool hian Villa chu 1-1 in an inhnehtawkpui - Villa hian Jacob Ramsey hmangin goal an khung hmasa zawk hial a, Firmino-a'n minute 89-naah Liverpool mualpho tur a chhanhim hram. Villa tan Ollie Watkins chuan penalty hlawh chhuak mah se goal-ah a chantir thei lo a, Reds tan Cody Gakpo chuan goal a khungah inngai mah se video assistant referee hmanga ennawn a nih hnuah pawm a ni lo bawk.
Liverpool tan season thara Champions League khel turin thilmak a thlen a ngai tawh - an hmabak match hniha Manchester United an tlawm ve ve a ngai a, Newcastle United hian CL an khel dawn, tia sawi ngam a ni tawh bawk.
Magpies hi goal difference-ah Liverpool-in an thlau hret a, Liverpool hi an hmabak match-ah chak se, Newcastle tlawm pawh ni se an point hmuh zat a inang chiah dawn a, Liverpool tan uchuak taka goal khung a ṭul ang. Newcastle hian zanin dar 12:30-ah Leicester City an mikhual dawn a ni.
Mangṭha Bobby
Liverpool-in an league match hnuhnung pasarihah hnehna an chang vek a, Villa lakah pawh chak tura beisei an ni - mahse, rin loh zawkin goal an khung hmasa a, a tawpah Firmino hmangin Reds-in point an hlawh chhuak hram.
Reds manager Jurgen Klopp-a'n hrem vangin khelmualah a naute a ho thei lo a, phone hmangin khelh dan tur a hrilh a ngai. Khelmual sira German coach awm lo hi Liverpool-in an tuar, tiin a sawi theih.
A tawpa sawi hlawh zawk ni ta erawh Firmino a ni a, Brazilian striker hian season tawp ruala Liverpool a chhuahsan tawh dawn avangin Reds fan-ten ui tak chungin an player hi an thlah.
Firmino bakah hian James Milner chu bench aṭanga luhtir niin, English midfielder hian captain armband nen Liverpool tana Anfield-a a match hnuhnung ber a khel bawk a, anni bakah hian Naby Keita leh Alex Oxlade-Chamberlain chu Anfield-ah thlahna hun hman a ni bawk.
Si Senor
Liverpool fan-ten Bobby pualin hla 'Si Senor' (Awle, ka pu) tih hla an nei a, Brazilian forward an ngaihsanzia an sakna hla a ni - a tawp nan Anfield-ah he hla hi an sa a, inkhelh zawha goalkeeper Alisson nena an inkuah vawng vawng khan Firmino tana Liverpool hlutzia a pholang.
Mahse, Mohamed Salah leh Sadio Mane te nena Liverpool her danglamtu forward hi a kum a tam ve ta a, khelhna hmun a chan reng bik tak loh avangin Reds a chhuahsan dawn - tun season-ah goal 12 khungin assist vawi nga a nei.
Klopp chuan, "Milly (Milner) leh Bobby ten he club tana an hnathawh hi a ropui takzet. Thawnthu ngaihnawm tak kan ziak ho a, tunah chuan a hrangin, thawnthu thar kan ziah a ṭul ve ve ta. Milly a awm dawn tawh loh avangin, hruaitu ṭha ni tura hma kan sawn a ngai a, Bobby hi chu Bobby a ni reng mai - an vaiin ka ngai dawn a, ngai tak chunga inthlah hi a ṭha a ni," a ti.
Reds defender Virgil van Dijk chuan, "Bobby chauh a ni lo, an vaiin ka ngai dawn. Bobby hi Sadio Mane leh Mo te nena an goal khung leh assist zozai avangin an pawimawh em em a, titi luahtu ber an ni ṭhin. Mahse, player chhuak tur dang pathum pawh hian Reds tan hna tam tak an thawk a, chuvang a ni ang, fan-te pawhin an zah em em a ni," tiin a ṭhiante a thlah ve bawk.