James awmna Lakers an talbuai

NBA Western Conference Finals khelh laiah Los Angeles Lakers an che fuh thei lo, anmahni khelmual Crypto.com Arena-ah ngei pawh an chak lo. Nimin zing game 3 inkhelah Lakers hi Denver Nuggets lakah 119-108 in an tlawm.

Best of seven series khelh turah Nuggets hian 3-0 in hma an hruai fal ta chiah. May 23, Thawhlehni zing dar 6:00-ah game 4 an khel leh dawn - Nuggets hi an chak a nih chuan conference champion an ni ang. NBA Finals khel turin an tling dawn tihna a ni.

Denver Nuggets tana point 37 neitu Jamal Murray chuan, "Ka hmuh dan chuan a tir aṭanga a tawp thlengin inkhel kan thunun. A che fuh hmasa zawk kan ni zel," a ti. Murray hian first half chhungin point 30 a nei tling hman a, a team chu dinhmun ṭha takah a dah.

LA Lakers star LeBron James chuan, "Kan beidawng tur a ni lo, match khat atan vawi khat chak a tawk, chumi tur chuan kan bei ang," tiin a sawi a, dinhmun ṭha lo takah ding mah se thawh chhuah leh theih ngei an inbeisei.

NBA Eastern Conference Finals lamah Miami Heat chuan Inrinni zing khan Boston Celtics chu 111-105 in an lo hneh ve bawk - Heat hian 2-0 a hma hruaiin an dinhmun an siamṭha ta hle bawk. Tukin dar 6:00 hian game 3 an khelh chhunzawm leh nghal ang.