CYMA Football-ah result a ngaihnawm

LBS Suzuki 21st Inter Branch YMA Football Tournament-ah team ṭha chiang taka chak an awm a, rinkai zawk chak lo an awm bawk. Inrinni khan khelmual paliah match 12 khelh a ni a, goal 60 ngawt a lut.

Lammualah upset a awm nghal. Mission Vengin tualchhung player tawnhriat nei ṭha an kawl chungin Tuikual South lakah an tlawm. TKS hi penalty shootout hmangin an vannei a, chutihhrualin 2-1 in hma an hruai tih hriat a ṭha.

Vawi thum champion tawh Electric Vengin Rangvamual 4-0 in an sawp a, veteran striker Lalhlimpuia'n (Tat-a) goal li a khung. Team tlo tur zinga mi College Veng pawhin Lungverh 7-1 in an sawp.

MZU Ground, Tanhril-ah goal a sur. Bairabi Jt-in Ramhlun Sports Complex 6-0 in an sawp a, Tlangnuamin Tlungvel Jt

7 - 0 in an sawp. Match tawp berah champion rinkai ni phak K. Malsawmkima enkawl Bawngkawn an inlan a, Tlangnuam Vengthar 11-1 in an sawp bawk. Bawngkawn tana goal khungtute hi ISL player Isak Vanlalruatfela, MPL hnuhnung ber best forward MC Malsawmzuala leh MPL-a sulhnu nei ṭha ber zinga mi MS Dawngliana te an ni nawk.

MFA Ground, Sairang Dinthar-ah cricket khel thiam veng Ramhlun Venglaiin Ramthar an barakhaih a, penalty shootout hmangin an hneh. MPL club nei Venghnuaiin Mamit Hmar Veng 1 - 0 in an hneh hram.

Upper Republic-in Serkhan 5 - 1 in an sawp a, MPL hnuhnung ber best keeper F. Lalmuanawma'n hattrick a siam a, a nau F Lallawmkima nen an chakna kawngah an ṭangkai hle.

MSSC, Lengpuia inkhelah Chalrang, Mualpui leh Laipuitlang ten an khingpui ṭheuh an hneh a, team pathum tan CYMA Football-a hnehna chan theih hi a hlu ang.