Nomawi chawitu Barca an chak lo

La Liga champion an nih hnua an match hmasa berah Barcelona chuan 2-1 in Real Sociedad an ngam lo a, an chak loh hnuah champion nomawi pek an ni!

Sociedad tan Mikel Merino leh Alexander Sorloth ten goal khat ve ve khungin, Catalan club tan Robert Lewandowski chuan minute 90-naah mualpho khuhna goal a khung a, Nou Camp-ah 2-1 in Barca an tlawm.

Hun tawp hnuah Barca hi La Liga trophy hlan an ni a, league match thum khelh tur an la hmabak. Barca tan Sociedad laka an result-in awmzia nei tawh lo mah se, mikhual Sociedad tan erawh Champions League khelh beiseina siamsaktu a ni.

Sociedad hian match thum khelh tur an la neih aṭanga point 65 neiin, pangana Villarreal chu point ngain an tlansan - Villarreal hian 2-1 in Girona an hneh thung.

Barca coach Xavi chuan, "Season tira ka thusawi kha inhriat chuan, lungrual taka hnathawk ho turin kan insawm a nih kha. Tunah chuan lawmthu sawi hun a ni ta - a hmasa berah President leh Board of Director ten tawp chin awm loa min thlawp avangin lawmthu ka sawi. Kan chhe lutuk lo a ni lawm ni President?" a ti a, a hlim hle.

Xavi chuan sawi zawmin, "An theihna zawng zawng hlantu staff leh player te chungah lawmthu ka sawi. Fan-te chungah lawmthu ka sawi bawk, in tel loin heng zawng zawng hi kan thleng thei lo. Stadium khat tlata lo pungkhawm ṭhinte, champion lawmnaa lo tel zawng zawng te, in chungah kan lawm e," a ti.

Barca captain Sergio Busquets chuan, "Hei hi a bul ṭanna chauh a ni tih tumahin an ringhlel lo ang. Fan-te chungah kan lawm a, he nomawi kan chawi theih nana min puitu staff-te chungah lawmthu ka sawi," a ti a, "Hector Bellerin, Pierre-Emerick Aubameyang, Gerard Pique, Memphis Depay te pawh inchungah kan lawm e," tiin season tir lama an hnena awm player-te pawh a hre reng - kum 34 mi Busquets hi season tawpah a chhuak dawn.

Nizan khan Real Madrid leh Atletico Madrid-te inlanin, he thu buatsaih a nih lai hian an result kan hre hman lo.