Bayern an tlu sawp, nomawi an chân thei

Bundesliga-ah Bayern Munich an champion chiang sa a, club dang zawngin pahnihna an zawng ṭhin tih chu tun season-ah thlak danglam theih a ni dawn. Inrinni khan Bayern Munich-in an mualah RB Leipzig 3-1 in an inlehthaltir a, Allianz Arena-ah point an hlawhchhuah zawh loh avangin Borussia Dortmund result-ah an innghat a ṭul tawh ang.

BVB hian nizan khan Augsburg an hmachhawn a, result kan hre hman lo. Edin Terzic hote hian hnehna an chang a nih chuan champion turin match hnuhnung berah Mainz an hmachhawn dawn a, an mual Signal Iduna Park-ah an khel dawn. Kum 2012 hnua league nomawi an chawi leh theihna hmasa ber tur a nih dawn avangin a boruak san dan tur hi thua sawifiah chi a ni lo.

Bayern an ṭha

Bayern-in champion turin chetsual a thiang lo tih an hria a, an elpui RB Leipzig lakah nung takin inkhel bul an ṭan. Captain Thomas Muller-a'n hnai tak aṭangin a khung lo a, minute 24-naah goal an hmu ta tho. Muller-a ball pek chu Serge Gnabry-a'n lalutin goal hmahruai a khung.

Bayern hian chance dang pawh an nei zui a, Jamal Musiala-a'n hnai tak aṭangin goal zawnah a pet lo. Tuchel-a hote hian goal khung belh tawh lo pawh ni se, an goal neih an humhim chuan champion turin match hnuhnung berah FC Cologne hneh chauh a ngai tawh ang.

An tlusawp

Minute 30 hnuah Bayern khelh dan a dang ta daih. Champion châkna an nei ta lo emaw tih mai tur a ni a, Leipzig-in keeper Yann Sommer tan hna an rawn siam nghal.

Chutihrualin Bayern hi an chance te pawh an la insiam tho a, an tlarhnung erawh a phui lo. Minute 64-naah Leipzig-in counter attack hmangin an vaw let a, Konrad Laimer-a'n chiang takin a khung.

Benjamin Pavard a chesual a, Christopher Nkunku lakah ṭul lo takin penalty a chawi. Minute 76-naah Nkunku hian penalty aṭangin hmahruaina goal a khung.

Bavarians tlarhnung a phui lo chhunzawm a, Nkunku-a'n chance ṭha bik a hlah. Bayern an vanduai chhunzawm a, corner kick aṭanga ball kal chuan Noussair Mazraoui kut a per - Dominik Szoboszlai-a'n minute 86-naah chak nemnghehna goal a khung.

Bayern manager Thomas Tuchel chuan, "Bul kan ṭan ṭha a, goal hnihna pawh khung thei tur kan ni. Minute 30-na hnuah kan khel ṭha lo a, second half-ah phei chuan engmah kan ti tawh lo. Sawifiah ngaihna pawh ka hre lo," tiin a sawi. Bavarians hian nomawi pathuma an champion theih laiin Julian Nagelsmann an ban a, Tuchel hnuaiah nomawi zawng zawng chan thei dihmunah an ding ta thung.