Qualifier 1 khel tur Chennai Super Kings

Indian Premier League-ah Chennai Super Kings-in record ṭha bik an nei a, IPL vawi 16 neih tawhah ṭum hnih chauh playoff an la thleng lo. MS Dhoni hote hian Inrinni khan Delhi Capitals chu 77 runs-in an sawp a, pahnihna dinhmun an nemnghet.

CSK hian Arun Jaitley Stadium-ah bat hmasak an thlang a, opener pahnih Ruturaj Gaikwad (79) leh Devon Conway (87) te an chet ṭhat avangin 223/3 runs an tlin. Delhi tan target a sang mah mah a, 146/9 runs chauhin an chhanglet.

Qualifier 1-ah Chennai hian champion lai Gujarat Titans chu May 23, Thawhlehniah an hmachhawn ang. Eliminator round khel turin Lucknow Super Kings an tling a, LSG hian Kolkata Knight Riders chu run khatin an hneh hram.

Eden Gardens-ah Lucknow-in Nicholas Pooran-a'n 58 runs a siam zarah 176/8 runs an siam. KKR tan umphak theiha ngaih ni mah se an bul ṭan ṭhat loh an tuar, over tawp lamah Rinku Singh-a'n four leh six sur tir mah se result a ti danglam lo. Nimin khan IPL match hnih a awm a, he thu i chhiar meuh chuan eliminator round-a Lucknow khingpui tur pawh a chiang tawh ang.