Everton beiseina a la bo bik lo

Premier League inhamtan tum Everton-in hun pek belh minute kuanaah defender Yerry Mina hmangin Wolverhampton Wanderers lakah si phurh sutna goal an khung a, Premier League-a inhamtan ve an tum zel.

Mualneitu Wolves hian Hwang Hee-chan hmangin minute 34-naah goal hmahruai an khung a, he goal hi an chakpui mai dawn niin a lang hman. Mahse, hun tawp dawnah Mina chuan si phurh sutna a khung a, point khat hlu tak an hlawh chhuak.

Mina goal khung hi striker phuahchawp Michael Keane-a siamsak a ni - English centre back Keane hi minute 29-naah hliam Nathan Patterson thlak turin luhtir a ni a, mahse, striker Dominic Calvert-Lewin chu hliam vanga lakchhuah a nih ve leh avangin tlarhmaah hun a hmang zui.

Keane hian goal khung zui chiah lo mah se a siamsaktuah a ṭang a, a team a chhanhim tiin a sawi theih. Mahse, Everton hian point hnih chiahin relegation zone an tlansan a, 18-na Leeds United leh 19-na Leicester City aiin match khatin an khel tam bawk.

Nizan khan Leeds hi West Ham nen inkhelin, an result kan hre hman lo - an chak chuan relegation zone tlansanin Everton hi an tlansan ang. Leicester hi zanin dar 12:30-ah an inlan dawn thung a, anni hian Champions League khelh tum Newcastle United an lenchilh dawn.

Nizanah Liverpool an chak loh avangin Magpies hian Champions League an khel chiang dawn, tiin a sawi ngam tawh a, hei hi Foxes tan vanneihna a ni thei - top four ni chiang tur Magpies hi an dinhmun a chian hma ai chuan an nem deuh tura ngaih a ni.