Italian Open champion Rybakina

Elena Rybakina chuan Anhelina Kalinina hnehin Italian Open nomawi a chawi. Inrinni zana final khelhah Kalinina hi set hnihna an khelh laiin a inhliam a, a ke vei lam hliam vanga khel zui thei loin 6-4, 1-0 in Rybakina a chak.

Russia khawpui Moscow-a piang, a hnu lama Kazakhstan ram tana inlan ta zawk Rybakina a khel ṭha a, set khatnaah pawh a chungnung. Darkar khat leh minute nga an inkhelh chhung pawhin dinhmun ṭha zawk a nih avangin chak a phu.

Kum 23 mi Rybakina-i'n season a hmang ṭha a, tun kara world ranking chhuak tharah pawh a sang zual pali zingah a tel phak tawh ang. May 28 aṭanga khelh tur French Open-ah pawh seeded sang zinga mi a ni phak dawn.

Wimbledon champion Rybakina chuan, "Ka vanneihna chu, ka khelh ṭhat ni a nih hi chuan eng hmunah pawh harsatna ka nei lo. Wimbledon lamah hlawhtlinna ka chang tawh a, tunah chuan clay court-ah pawh ṭha takin ka khel thei," a ti.

Hmeichhe player tam zawkin hmun hran hrana inkhelh an harsat ṭhin. Kum 2009 aṭanga chhiarin Serena Williams, Petra Kvitova, Simona Halep, Garbine Muguruza leh Ashleigh Barty te tih lohah chuan Rybakina hi clay, grass leh hard court-a Grand Slam leh Masters title la thei awmchhun a la ni hial.

Mipa singles lamah Daniil Medvedev chuan Stefanos Tsitsipas a hneh a, inkhel lehlamah Holger Rune-a'n Casper Ruud a hneh bawk - nizan khan final khelh chhunzawm nghal niin result erawh kan hre hman lo.