United tan Casemiro-a goal a tawk

Casemiro-a goal mawi hmangin Manchester United chuan Bournemouth 1-0 in an hneh. Erik ten Hag-a naute hi Premier League aṭanga Champions League khel turin an tling chiang teuh ta hle, match hnih hmabak aṭangin point khat chiah an mamawh tawh.

Inrinni zan Vitality Stadium-a inkhelah hliam vangin Marcus Rashford a inlan thei lo - Man United tan season kal laia goal khung hnem ber Rashford (17 goals) tel lo chuan goal khung an harsat leh mai rinna pawh a lian.

Mahse, minute kuana lekah Bournemouth defender Marcos Senesi-a'n ball kang lai pet chhuah a tum a, mahse a duh angin a pet thei lo - ball kang hi lei a thlen hmain Casemiro chuan laklawh nei miah loin a bin lut - keeper Neto tan dan ngaihna a awm lo.

Inkhel dangah Liverpool-in point khat an hmu a, hei vang hian Man United tan UCL ticket nei turin nghah leh rih hret a la ngai - Ningani zanah Chelsea an mikhual dawn a, season tawp khar nan Fulham nen Old Trafford-ah an inkhel leh bawk ang.

Man United manager Ten Hag chuan, "Goal khat aia tam kan khung belh lo kha sawiselna tur kan neih awmchhun a ni mai ang, thil dangah chuan kan hna kan tlin ṭha hle. Casemiro goal a ṭha takzet a, kan team hian tun season chu goal khung hnem hi kan harsat.

"Liverpool inkhel result lamin min tibuai lo, a pawimawh zawk chu keimahni hi a ni. Kan hmabaka hna thawh tur awm hlenchhuah ngei kan tum ang," tiin Champions League khelh theih ngei a inrin thu a sawi.