Manchester United 'B Team' an chak hram

Manchester United-in Nilaini zan khan Old Trafford-ah LASK 2-1 in an hneh a, first leg-a an chakna nen 7-1 in hnehna an chang. Ole Gunnar Solskjaer-a'n Premier League season tawp lama an player chhawr rim ho a dah ṭha a, 'B Team' tia chhal theih inlanin Austrian club lakah inkhel thunun an harsat.

United hian Copenhagen an hmachhawn dawn a, Europa League quarterfinal hi RheinEnergieStadion-ah August 10, Thawhṭanni zan dar 12:30-ah khelh a ni ang. 

Norwegian manager Ole Gunnar Solskjaer-a'n bul ṭantu zingah captain Harry Maguire a telh a, a bak player 10 te erawh tun dinhmuna United player ṭha ber niin a lang lo. Chtuihrualin left back Brandon Williams erawh Luke Shaw a inhliam avangin bul ṭan zel tura ngaih a ni thung.

LASK hmachhawn tur hian Sergio Romero; Timothy Fosu-Mensah, Eric Bailly, Maguire (c), Brandon Williams; Scott McTominay, Fred; Juan Mata, Jesse Lingard, Daniel James leh Odion Ighalo ten inkhel bul an ṭan.

United bul ṭantute hi nem deuhin lang mah se first leg-ah 5-0 in an chak tawh. Hemi ṭuma bul ṭan zingah Bruno Fernandes leh Luke Shaw te chiahin bul an ṭan nawn lo a, an aiah Lingard leh Williams te an lut.

Premier League-ah United-in pathumna dinhmun an luah theih nan Fernandes, Paul Pogba, Marcus Rashford, Mason Greenwood, Martial leh Aaron Wan Bissaka te awm loh a lang. 

LASK-in goal nga an chhuah tawh avangin mualpho lehna tur chuang a awm lo a, na takin pressure an pe ngam. United midfielder zingah ball pawt muang thei an awm lo a, inkhel thunun thei an awm lo. Fred leh McTominay te ke aṭangin ball fing a chhuak lo a, Juan Mata pawh a kum a upat leh a khelh tam tawk loh avangin a ṭuan fum ve ta bawk.

Leicester City nena goal khungtu Jesse Lingard chu United tana khel ṭha ber a tih theih a, English midfielder flick mawi zet chu Odion Ighalo-a'n goal hmahruai khung nan a hmang teuh hle. Halftime-ah goal a lut lo a, LASK laka inkhel thunun thei lo United-in hma hruai an phu lo.

Second half-ah LASK zawkin goal an khung hmasa a, corner aṭanga ball chuak chu Philipp Wiessinger-a'n minute 55-naah mawi zetin goal kilah tak a khung.

Goalkeeper Sergio Romero a dem theih lo a, Solsjkaer-a'n a naute goal a venhimtir theih dan erawh a sawisel theih thung. Box chhungah United player zawng zawng an awm vek a, heti chunga goal an chhuah tho avangin player rem dan ennawn a ṭul ang.

United-in an chhanglet vat a, Juan Mata through ball ṭha zet chu Jesse Lingard-a'n minute 57-naah siphurh sut nan a hmang. Solskjaer-a'n Old Trafford-a tlawm a duh lo a, player neih ṭhat Paul Pogba luhtirin French midfielder hian hun rei lote chhungin midfield a luah hneh hle.

Hun tawp hnaih lamah Anthony Martial a rawn inlan a, French forward hian mawi zetin Juan Mata nen Copenhagen tlarhnung an ṭhiat a, minute 88-naah second leg bika chakna goal a khung.

United youth team captain Teden Mengi-a'n minute 84-naah Timothy Fosu-Mensah a thlak a, senior team tan a vawi khat nan a inlan. Kum 18 mi defender Mengi hi Maguire leh Bailly te nen defence laiah an ding a, an khingpui a ṭhat tawk loh avang leh a inlan hun chhung a rei loh avangin khelmuala a chet dan thlir thui zui erawh a rem lo.

Bench aṭangin Andreas Pereira pawh a inlan a, Brazilian midfielder hi seson tir lama a chet dan ṭhin ang thoin goal hmaah a hriam tawk lo. Chutihrualin bench aṭanga inlan Tahith Chong a hmunawm hle. 

Manchester United manager Ole Gunnar Solskjaer chuan, "Player-te hian an theihna anga khel chhuak turin khelh tam an mamawh. Kan player ṭhenkhatte tun hnaiah an khel tam tawk lo a, khelhna hun an nei thei hi a lawmawm. Teden Mengi-a'n United tana a match hmasa ber a khel bawk a, zan duhawm tak a ni," tiin a sawi.

Inkhelh hmabak sawi chhunzawmin Solskjaer chuan, "Tunah chuan inringtawk takin Germany kan pan thei ang. Kan hmabak a harsa dawn a, Copenhagen aṭangin a khirh nghal ang. Stale Solbakken (Copenhagen coach) hi ka ṭhian ṭha tak a ni a, squad ṭha tak a neih bawk avangin a awlsam dawn lo," a ti.