Inter-in Sanchez an lalut

Inter Milan chuan Manchester United aṭangin Alexis Sanchez chu a thlawnin an lalut a, Chilean forward hian June 30, 2023 thleng atan contract a ziak. Inter hian Alexis hi August 2019 khan season khat chhung atan loan hmangin an lalut a, kum 29 mi hian inelna hrang hrangah match 29 inlan sakin goal li a khung.

United boss Ole Gunnar Solskjaer chuan, "Player ṭha tak a ni a, chhan hrang hrang avangin keini chuan a ṭhat lai ber kan hmu lo. Italy-ah a hlim a, duhsakna sang ber kan hlan e," tiin a sawi. Sanchez hi January 2018 khan Arsenal aṭangin Old Trafford-ah a kal a, United hian sum seng lo mah se London club-ah Henrikh Mkhitaryan a kal thung. Chilean forward hian match 45 khelin goal nga chauh a khung a, kar khatah £400,000 zet a hlawh avangin United-in a theh thang dan tur an zawng.

Sanchez hian man nei loin Inter Milan zawm mah se kum hnih chhung contract a la neih avangin United-in kum hnih chhung atana an hlawh pek tur pound maktaduai 40 an pumpelh thung. United hi Sanchez aṭangin an inzir fing a, hlawh tam uchuaka player vulh an ngam ta lo - hei hian Jadon Sancho lakluh an tumna kawngah pawh  nghawng a neih phah bawk.

Sanchez hi Inter Milan-ah Manchester United tana a khelhpui Romelu Lukaku leh Ashley Young te nen an khel ho a, Europa League-ah champion rinkai ni phakin Ole Gunnar Solskjaer hote nen inhmachhawn thei dinhmunah an ding.