Inter tan Lukaku leh Eriksen

Serie A pahnihna Inter Milan-in Europa League last 16-ah Spanish club Getafe an hmachhawn a, Romelu Lukaku leh Christian Eriksen te goal hmangin 2-0 in an chak.

Covid-19 vangin first leg an khel hman lo a, hemi a nih avang hian neutral ground-ah single leg-in quarterfinal khel tur an zawng. Veltins-Arena, Germany-ah Inter Milan-in goal khung thei bik striker an neih an vanneihpui. Minute 33-naah  Alessandro Bastoni ball vawrhluh chu Lukaku-a'n box chhungah um lutin hmun chep tak kar aṭangin a pet goal.

Getafe-in siphurh sutna hun ṭha an nei a, Diego Godin kutin ball a fuh avanga an penalty hmuh chu captain Jorge Molina-a'n petin goal zawnah a pet lo. Inter hian Premier League lama hming langsar Lukaku leh Ashley Young te nen bul an ṭan a, second half-ah Alexis Sanchez leh Christian Eriksen te an luhtir leh bawk.

Tottenham midfielder hlui Eriksen hian minute 82-naah Marcelo Brozovic a thlak a, minute khat pawh tling loah Getafe defender Djene Dakonam ball petchhuah sual chu Danish midfielder hian goal-ah a chantir a, 2-0 in inkhel a tawp.

Getafe coach Jose Bordalas chuan, "Kan khel ṭha takzet a, penalty chu hlah lo ila inkhel a danglam thei ang. Chutihrualin tumah ka dem lo a, kan thlen chinah kan lawm hle a ni," tiin a sawi. Inter Milan manager Antonio Conte chuan, "Getafe-in bul an ṭan ṭha zawk a, zawi muangin inkhel kan thunun chhho. Ka lawmna em em chu tute pawh an ṭangkai a, khelmuala inlan lote pawhin team an thlawp ṭha. Ka naute rilru put hmangah ka lawm a, chawlh hman aia inkhelh zel an châk avangin ka fak a ni," tiin a sawi.

Nerazzurri hian quarterfinal-ah Rangers leh Bayer Leverkusen chak zawk an hmachhawn dawn a, inelna hi Germany-ah khelh chhunzawm tur a nih avangin German club hmachhawn a châkawm lo ang.