Premier League vawi ruka vawi nga champion Pep Guardiola 'Manchester City'

Khawvela league harsa bera an sawi ṭhin Premier League-ah Pep Guardiola-a'n ro a rel a, Manchester City chu season ruk chhungin vawi nga a champion pui. Pathianni zan khan Etihad Stadium-ah Man City hian Chelsea 1-0 in an hneh a, inkhelh zawhah champion an lawm zui bawk.

Inrinni zanah Arsenal-in Nottingham Forest an hneh loh avangin Man City an umpha thei tawh lo a, Pathianni zan hi Pep-a hoten tun season-a an mual Eithad Stadium-a an khelh hnuhnun ber a nih avangin nomawi inhlanna hun an hmang. Pep-a hoten Premier League nomawi an chawi a, FA Cup leh UCL final khelh turin a la hmuak - 'treble champion' thei an ni.

City 'B' Team > Chelsea

Pep Guardiola-a'n Chelsea hmachhawn turin player ṭha ber a chhawr lo a, 'B Team' ti hiala sawi theih a luhtir. City hian UCL final 2021-ah Chelsea an hneh lo a, an vanduai - hemi hnu hian vawi ruk an inkhel leh tawh a, City an chak vek.

Pathianni khan City-in team nem zawk luhtir mah se minute 12-na leka Julian Alvarez-a goal hmangin Chelsea hi 1-0 in an hneh. Blues hian minute 90 chhungin chance ngah mah se mualneituin ball an chang tam a, Frank Lampard-a hote tan mualphona a ni.

City bench-ah Jack Grealish (£100m), Rodri (£62.8m), Rúben Dias (£62m), Kevin De Bruyne (£55m), Erling Haaland (£52m), John Stones (£47.5m), Bernardo Silva (£43m), Ederson (£35m) leh Ilkay Gündogan (£20m) te an ṭhu a, an man belhkhawm chu pound maktaduai 477.3 a ni.

Sir Alex umtu Pep

Man City hi Pep-a hnuaiah an champion a ni ringawt lo a, season hnuhnung parukah champion zia an chhuah vek. Pep-a hote hian an champion hmasak ber khan point 100 an hmu a, a hnu lamah pawh 98 pts, 81 pts (pahnihna), 86 pts, 93 pts leh 88 pts (match hnih khelh tur a la awm) te hmuin point 80 an hmu tling vek.

Spanish manager Pep-a awm hnuah chuan Premier League champion turin point 90 hmuh a ngai a ni ber a, Barcelona leh Bayern Munich manager hlui Pep hian English football inelna kalphung a thlak danglam hle.

Sir Alex Ferguson-a hnuaiah Man United chu vawi thum a zawnin an champion tawh a, City-in Pep-a hnuaiah a zawnin vawi thum nomawi an chawi a, vawi li champion thei dinhmunah an ding.

City hian Premier League nomawi vawi sarih an champion tawh a, season tharah pawh champion rinkai ber an ni dawn. Pep-a hi Etihad Stadium-ah a cham rei a nih chuan Man United record vawi 13 champion pawh hi a him kher lo ang.