Turkish champion sawptu Copenhagen

Arsenal leh Manchester City defender hlui Gael Clichy-a'n Europa League quarterfinal-ah Manchester United hmachhawn a châk thu a sawi a, amaherawhchu French left back duhthusam a thleng dawn lo. Nilaini zan khan Copenhagen-in Turkish champion Istanbul Basaksehir 3-0 in an sawp.

Copenhagen hi khualmualah 1-0 in chak lo mah se an mual Parken-ah 3-0 a an chak avangin an lehthal a, Europa League quarterfinal-ah Manchester United an hmachhawn ang. Danish club tan hian Jonas Wind-a'n goal hnih a khung bakah Rasmus Falk-a'n goal khat a khung bawk a, Istanbul Basaksehir-in a chhanletna an nei lo.

FC Copenhagen hi FC Kobenhavn tiin an sawi bawk a, FCK tiin an ko mai ṭhin. Denmark khawpui Copenhagen-ah mualneituin ṭan phat aṭangin beisei an nei tih a chiang a, an passing mawi takin rah ṭha a thlen nghal.

Minute 4-na lekah Jonas Wind-a'n ṭha zetin a tauh lut a, ball cross-tu hi Guillermo Varela a ni. Uruguayan right back Varela hi Manchester United tana khel tawh ṭhin a ni a, quarterfinal-ah a club hlui a hmachhawn dawn.

Istanbul Basaksehir an insiamrem a, chutichung chuan Copenhagen an khel ṭha zawk. Second half ṭan chauh tihin Falk-a ball pet luh chuan Turkish midfielder Mehmet Topal-a kut a per a, penalty a hlawh chhuak. Minute 51-naah Copenhagen forward Wind-a'n cool takin a khung.

Jonas Wind hi Copenhagen chhul chhuak a ni a, kum 21 mi chauh niin 6ft 3in-a sang a ni a, hmabak a nei êng hle. Kuminah inhliam vangin a inlan tam tawk lo a, chutihrualin Superliga match 13 a khelh aṭangin goal sarih a khung thei a, chhinchhiah a sual lo ang.

Copenhagen khelh ṭhat leh vanneih a kaltluang a, minute 61-naah Ramus Falk-a'n thui tak a khalh hnuah ṭha takin a khung. Turkish champion-in away goal rule hmang ṭangkai thei turin goal hnih an mamawh a, goal khat pawh an khung thei lo.

Istanbul Basaksehir-in tlarhmaah Demba Ba bul an ṭantir a, Robinho erawh Europa League squad-ah a tel lo. Liverpool defender hlui Martin Skrtel leh Arsenal defender hlui Gael Clichy bakah Valencia midfielder hlui Mehmet Topal ten bul an ṭan a, amaherawhchu Copenhagen khelh ṭhat zan an tawn avangin an che thei lo.

Istanbul Basaksehir coach Okan Buruk chuan, "Kan result avangin ka inthiam lo hle. Ṭum danga kan khelh ṭhin dan angin kan khel thei lo a, ka thiam loh a ni. Copenhagen an khel ṭha a, an tlan tam a, kawng engkimah an chungnung avangin chak an phu a ni," tiin khel ṭha zawk an chak thu a sawi.