Zaninah Gujarat Titans Vs Chennai Super Kings; Mumbai Indians puitu Shubman Gill

Indian Premier League-ah playoff khel tur a chiang a, kartawp inkhel boruak a sang hle. Pathianni tlai khan Mumbai Indians-in Sunrisers Hyderabad hnehin playoff khelh beiseina an nei a, zan lama Gujarat Titans leh Royal Challengers inkhel result-ah an innghat. Gujarat tan Shubman Gill-a'n century a siam a, Titans chakpuiin Virat Kohli telna Bangalore beiseina a tawp a, playoff khel turin Mumbai an tling ta thung.

Zanin hian M. A. Chidambaram Stadium, Chennai-ah qualifier 1 khelh a ni nghal dawn a, Gujarat Titans leh Chennai Super Kings te an inkhel dawn. May 24, Nilaini zanah Lucknow Super Giants leh Mumbai Indians ten Eliminator an khel ve leh ang.

Target um thiam Mumbai

Mumbai Indians-in playoff khel turin chak an mamawh a, Gujarat puihna an mamawh bawk. Pathianni tlai khan Mumbai hian Sunrisers Hyderabad an hmachhawn a, beisei tur nei tawh lo Hyderabad hian 200 runs an siam.

Target hi tam thaw khat viau mah se Mumbai tan 200 runs um phak hi thil theih a ni. Ishan Kishan (14) leh Rohit Sharma (56) ten bul an ṭan chhe lo a, Cameron Green (100*) leh Suryakumar Yadav (25*) ten thi loin a tawp an rawn khar a, over hnih dah bangin 201/2 runs an siam.

Bangalore veltu Gill

M. Chinnaswamy Stadium-ah mualneitu Royal Challengers Bangalore-in bat hmasak an thlang a, Virat Kohli-a'n thi loin ball 61 lekah 101 runs a rawn siam. RCB hian over 20-ah 197/5 runs an siam a, an hum theih chuan playoff an khel dawn.

Kohli hian IPL nomawi a la chawi loh avangin tun ṭum hi a huna ngaitu pawh an ṭhahnem. Mahse, beisei ang ngawtin thil a thleng lo. Gujarat Titans bat hun a thleng a, opener Shubman Gill-a'n thi loin ball 52-ah 104 runs a siam.

Vijay Shankar-a'n Gill hi a rawn thlawp ṭha a, 53 runs rawn siam ve bawkin Gujarat hian 19.1 overs-ah 198/4 runs siamin wicket rukin an chak. Gill chet ṭhat zarah India captain Rohit Sharma hoten playoff an khel dawn a, captain hlui Kohli hote tan IPL a tawp thung.

A hmuhnawm dawn

Gujarat Titans hi champion lai an ni a, kuminah pawh league round-ah pawh pakhatna an ni a, team ṭha bera chhal ngam an ni. Chutihrualin an khingpui tur Chennai Super Kings hi MS Dhoni captain-na hnuaia khel an ni a, an khelhna hmun tur hi Chennai a ni bawk.

Tun season ṭantirh khan Titans leh CSK hi an inkhel a, Hardik Pandya captain-na hnuaia khel team hi an chak nghal. Hemi ṭuma an inkhelhna hmun hi Narendra Modi Stadium a ni a, Gujarat lamin 'home advantage' an nei tihna a ni.

Titans tan bowler Mohammed Shami leh Rashid Khan ten wicket 24 ve ve an la tawh a, Shubman Gill-a'n 680 runs a vaw chhuak tawh bawk. Chennai Super Kings lamah 585 runs siam tawhtu Devon Conway a rintlak a, Ruturaj Gaikwad leh Shivam Dube te pawh team tan an ṭangkai ṭhin hle.