A vawi khat nan clay-ah Medvedev a champion

Tennis khelhna hmun a inang lo a, hei vang hian player-te pawhin inkhelh thiam bikna hmun an nei. Daniil Medvedev tan clay court hi inkhelh harsatna hmun a ni ṭhin, tun season erawh thawnthu a danglam ta.

French Open inbuat-saihna pakhat, inelna lian dawta ngaihhlut ni bawk Italian Open khelh zawh takah Daniil Medvedev hian Holger Rune chu 7-5, 7-5 a hnehin a champion.

Season dangah chuan clay court bikah Medvedev hi chak ni hmel hmu loin a tla nasa. Kuminah erawh Russian tlangval hi a khel ṭha pangngai viau - season kal laiah nomawi panga a chawi tling ta hial bawk.

Italian Open champion a nih avang hian world ranking lamah pawh a dinhmun a siam ṭha, tun kara ranking chhuak tharah Novak Djokovic khumin pahnihna a ni ang - French Open lamah pawh seeded pahnihna a ni dawn.

Russian tlangval Medvedev chuan, "Zep loha sawi chuan clay court-ah kher hi chuan Masters 1,000 title ka lak theih hi ka ring ngai lo. Tennis hi ka ngainain ka hmangaih a, tun hma chuan hard court ka ngaina zual ṭhin.

"Tunah chuan clay court ka en dan pawh a danglam chho ta, clay-ah ka chak ve thei a ni tih a taka ka lantir thei hi ka lawm," a ti a, inelna lian French Open atan beisei a neih san thu a sawi tel bawk.

Rome khawpuia inelnaah hian tun hmain Medvedev hi vawi thum a inlan tawh a, chak ni hmel a la hmu ngai lo. Tun season erawh final thleng hian match ruk a khelh aṭangin set khat chiah a hloh hial.