Heat tan match khat chak a la ngai

NBA Eastern Conference Finals khelh laiah Miami Heat dinhmun a ṭha ta hle, conference champion ni turin match khat chak chauh an hmabak ta. Nimin zing khan Heat hian Boston Celtics chu 128-102 in an hneh.

Best of seven series khelh turah Miami Heat hian 3-0 in hma an hruai fal. May 24, Nilaini zing dar 6:00-ah game 4 an khel leh dawn, anmahni muala inkhel tur an nih avangin Heat dinhmun a ṭha hle - Celtics tan thih thaa beih a ngai dawn thung.

Western Conference Finals lamah Denver Nuggets chuan Los Angeles Lakers lakah 3-0 in hma an hruai ve mek bawk, tukin hian game 4 an khel. Conference pahnih champion te hian NBA Finals an khel chhunzawm leh dawn a ni.

Regular season hman lai kha chuan Boston Celtics hi table-ah pahnihna an ni a, seeded pahnihna an ni phak. Heat erawh pariatna an ni a, seeded hniam ber ni mah se playoff chinah erawh team hlauhawm tak an ni thung.

Hnehna an chan theih nan hian Gabe Vincent (29 points) leh Ducan Robinson (22) te an khel ṭha a, anni pahnih bakah hian player dang pali te chuan point 10 chuang an nei thei bawk a, mimal ni loin team thawhhona chu an chakna hnar a ni.

Boston Celtics tan Jayson Tatum-a'n point 14 chauh a nei a, an thiampuipa pakhat zawk Jaylen Brown chuan point 12 bak a nei lo - an pahniha an point belhkhawm hi 26 chauh a ni! An hniam fal lai chuan point 33 zeta hnufual lai pawh an nei hial.

Celtics head coach Joe Mazzulla chuan, "Team tana thil ṭha leh pawimawh ka hriatchhuah a ngai, kan chet fuh lohna hi ka mawhphurhna a ni," tiin a naute khelh dan tur a ruahman fuh tawk lo tih a sawi a, game khelh hmabak an la neih avangin an la beidawng lo tih a sawi bawk.