Mizoram MMA team-in gold pathum la

6th MMA India National Mixed Martial Arts Championship khelh zawh taka Mizoram aiawha feh chhuak fighter-te chuan gold medal pathum leh silver medal pakhat an rawn hawn - he inelnaa tel tur hian Mizoram State MMA Association (MISMA) chuan fighter pariat a tir a ni.

May 18-21 chhunga neih inelnaah hian Nazareth Lalṭhazuala (flyweight), Zarmawia (featherweight) leh David Lalmalsawma (lightweight) te chuan gold medal an la a, Lalnunmawia chuan silver medal a rawn hawn ve bawk - Zarmawia leh Nazareth-a te hian best performance award (MMA glove) an dawng hial.

Lucknow-a neih inelnaah hian Chhattisgarh chuan gold medal 15 lain team champion an ni a, MISMA president Jeremy L. Pautu chuan Mizo fighter-te training petu MISMA hnuaia club pahnih - SPES gym (Dawrpui Contact Sports) leh HBK Gym chungah lawmthu a sawi a, Mizoram sorkar chungah lawmthu a sawi bawk.

Kickboxing aṭanga inzir Nazareth-a hian round of 16-ah submission (armbar)-in hnehna a chang a, quarterfinal leh semifinal-ah technical knockout-a chakin, final-ah Asian Championship-a bronze medalist ni lai chu unanimous decision-in a hneh a ni.

Muaythai aṭanga inzir Zara'n national record a siam a, Chite veng tlangval hi national championship-a weight pathum welterweigt (-77 kgs), lightweight (-70kgs) leh featherweight (-65.8 kgs) a champion vek thei awmchhun a ni - tun ṭuma gold hlawh tur hian record ṭhat vangin round of 16 a khel lo a, quarterfinal leh semifinal chu tko hmanga paltlangin, final-ah unanimous decision-in a chak thung.

Lightweight final-ah Mizo pahnih intawngin, David leh Mawia ten gold an inchuh a, a tawpah split decision hmangin David-a a chak - David-a hi last 16 leh quarterfinal-ah tko-in a chak a, semifinal-ah Knockout-in a chak zui. Pool lehlamah Mawia hi round of 16-ah knockout-in a chak a, quarterfinal-ah Submission (armbar)-a hnehna changin, semifinal-ah tko-in chak mah se final-ah erawh a vanduai zawkah a ṭang ta a ni.