La Liga hi racist-te ta a ni - Vinicius

Real Madrid forward Vinicius Junior chuan Valencia an hneh loh hnu lawkah na takin La Liga a sawisel a, khualmuala a vun rawng avanga hmuhsitna a tawk chu a tuar dam thei lo.

Pathianni zan khan Real hian Valencia chu khualmualah an lenchilh a, mualneitu team hian Diego Lopez hmanga goal awmchhun khungin an mikhual hi 1-0 in an lo hneh.

Mahse, inkhel result aiin Vinicius chunga thil thlengin ngaihven a hlawh zawk - Brazilian forward hian a vun rawng avanga auh nawmnah a ni chu a hrethiam lo a, inkhelh laiin Valencia fan-te a hmachhawn hial!

Brazil international rilru a fim tawk lo zui - hun pek belhah Valencia striker Hugo Duro nen an inbakkaih avangin hnawhchhuah a ni a, social media lamah na takin La Liga a dem zui.

Misualte vanram

Vinicius chuan, "Ronaldinho, Ronaldo, Cristiano Ronaldo leh Lionel Messi te tual chaina ṭhin chu, midang hmuhsit chingten nuam ti taka tual an chaina a chang ta. Hei hi a vawi khatna a ni lo a, a vawi hnihna emaw a vawi thumna emaw pawh a ni lo.

"Chi inthliarna hi La Liga-ah chuan thil thleng ve ṭhin pangngai reng a ni. La Liga chuan heng thil thleng ṭhin hi engahmah a ngai lo a, Spanish FA pawhin a ni tho a, tam takin an lo thlawp bawk," a ti a, a ṭawng na hle.

Vinicius hian a duhtawk mai lo - kum 22 mi forward chuan, "Ram mawi tak, lawm taka min lo lawmtu leh ka hmangaih em em hian, khawvel hriatah chi inthliarna thlawptu an ni, tih pholan an hreh lo a nih hi. Ka thusawi pawm lo Spaniard zingah an awm mai thei. Mahse, Brazil-ah chuan he ram hi chi inthliarna hmun, tiin kan hre mek a ni," a ti.

Brazilian forward chuan sawi zawmin, "Vanduaithlak takin, kar tina thil thlengah hian invenna tur ka nei miah lo. Mahse, mi chak tak ka ni a, eng ang pawhin harsa dawn se, hetianga inhmuhsit chingtute do hian a tawp thleng ka kal ang," a ti a, huaisen taka beih let zel a tum.

Thutlukna dik lo

Vinicius hian tun season-ah vun rawng avanga hmuhsitna a tawk ngun hle. Valencia lakah hian second half-ah phei chuan thinrim takin fans lam a pan hial a, rei lotê chu inkhel tihtawp a ni hial - hemi hnuah hian ngai a awh leh tawh lo tih hmuh turin a awm a, a tawpah red card a chawi.

Real manager Carlo Ancelotti chuan, "Vawiina kan thil hmuh kha pawm zam theih a ni lo - stadium pumpuiin chi inthliarna lam hawi an au pui a ni. Vawiinah hian football chungchang sawi pawh ka duh lo a, sawi ṭulna pawh a awm lo. Referee hnenah pawh match kha tihtawp awm tak a nih thu ka hrilh a ni," a ti.

Italian coach chuan sawi zawmin, "La Liga hian buaina a nei a ni. Ka tan chuan Vinicius hi khawvela player pawimawh ber a ni hial ang - hetiang ang inhmuhsitna a thlen hi chuan game hi tihtawp mai tur a ni. Stadium pumpui kha mawi lo takin an zai a nih kha.

"3-0 in chak pawh ni ila, ka sawi ngai tho ka sawi ang. Game kha tihtawp tur a ni - kawng dang thlan tur a awm lo," a ti a, King Carlo chuan sawi zawmin, "Khelh zawm zel a duh leh duh loh ka zawt a, a duh angin a khelh chhunzawm. Vinicius khan hrehawm a ti a, a thinrim em em bawk. Kan chenna khawvelah hetiang hi a thleng tur a ni lo," a ti a, a player a chhan hle.

Beiseina

Vinicius-a'n na takin La Liga dem mah se Spanish top flight league hi an ngawi reng bik lo a, La Liga chuan thil thleng hi an zirchian tur thu leh, Vinicius-a chunga thil thleng ṭhin avangin a thlen nawn tawh lohna tura theihtawp an chhuah ṭhin thu an sawi.

La Liga chuan he an hmalaknaah hian, tun hnai season hnih chhung khan Spain-a dan kengkawhtute lamah report pakua an thehluh tawh thu an sawi bawk. La Liga chuan inhmuhsitna thleng chungchangah thil thleng chu finfiah a nih chuan dan anga na taka hma an lak tur thu an sawi bawk a, video-a thil thleng lo nei an awm chuan an hnena thehlut turin an ngen bawk.

Hetihlai hian Valencia chuan thil thleng chu an chhui tur thu an sawi ve bawk a, Spanish club chuan thuchhuah siamin, "Football-a hetiang thil thleng duhawm lo awm ṭhin hi na takin kan dem a ni. Club chuan infiamna leh mihring inzahtawnna a ngaih pawimawhzia tilang chungin, vantlang hriatah he thil thleng hi kan dem takzet tih kan sawi duh a ni.

"Club chuan thil thleng hi a zirchiang ang a, a ṭul angin hma a la zui ang," an ti a, awm mai mai an tum bik lo.