Champion lawm nan Napoli an chak

Serie A champion an nih hnuah pawh Napoli an la inthlahdah mai lo. Andre-Frank Zambo Anguissa, Giovanni Di Lorenzo leh Gianluca Gaetano te goal hmangin Inter Milan chu 3-1 in an hneh.

Diego Armando Maradona Stadium-a inkhelah hian chawlhlawk hmain mikhual Inter midfielder Roberto Gagliardini chu hnawhchhuah a ni a, player kim loa an khelh hnuah goal thum an chhuah a ni.

Luciano Spalletti enkawl Napoli hian tun season Serie A nomawi an chawi a ni satliah lo, an elpui club dang 19 te chu an hneh kim ta vek - a chung ber dinhmun luahtu nih an phu hle.

Inter tana Romelu Lukaku goal khungin awmzia a nei phak lo a, chutihrualin tun hnaia Lukaku a rawn khel ṭha leh ta hi Inter tan chuan lawmna tur a ni - Champions League final khelh hmabak an la ni.

Serie A aṭang hian season tharah Napoli chuan Champions League an khel dawn tih a chiang tawh, hmun ruak dang pathum hnawhkhat tur erawh a la chiang thei rih lo.

AC Milan pawhin beisei an la nei ve zel - Inrinni zan khan Milan hian Sampdoria chu 5-1 in an sawp a, striker Olivier Giroud chuan hattrick a siam. Table-ah pangana niin, an chunga awm Inter an phak lohna chu point hnih a ni.