PSG ban phakah Ligue 1 nomawi

Paris Saint Germain chuan Ligue 1 nomawi an hnaih ta hle - France rama football inelna sang bera champion tur hian point khat hmuh belh chauh an mamawh ta, khelh hmabak match pahnih an la nei.

Pathianni zanlai khan PSG hian Auxerre an lenchilh a, minute 10 pawh a tlin hmain Kylian Mbappe chuan goal hnih a khung hman, mualneitu lamin Lassine Sinayoko hmangin chhanglet ve mah se Paris club hi 2-1 in an chak.

Kum 24 mi Mbappe hian PSG tan tun season inelna hrang hrangah match 41 aṭangin goal 40 a thawk chhuak, league bikah match 32 aṭangin goal 33 zetah a inrawlh bawk a, a team a champion pui ngei dawn niin a lang ta.

Christophe Galtier-a enkawl Paris Saint Germain hian Inrinni zanah Racing Strasbourg an hmachhawn dawn, point khat lek pawh an hmuh belh a nih chuan an hnuaia awm Lens inkhel result ngaihchan ngai loin an champion ang.

PSG hian tun hnai season 10 chhungin Ligue 1 nomawi hi vawi riat an chawi thei, a pumpuiah vawi 10 champion tawhin Marseille leh Saint-Etienne te nen champion hnem an ni - kuminah record an siam ngei dawn.

PSG coach Christophe Galtier chuan, "Inkhel bul ṭan ṭhat pawimawhzia kan hria a, kan duh ang takin a tir lam minute 35 chhung chu kan khel thei, a hnu lamah erawh kan tlahniam hret.

"Duhthusama ṭhain season kan hmang lo tih chu kan hria, chutihrualin Ligue 1 hmawrbawkna hi chu a ṭha thei ang ber ni se ka duh, chutiang tur chuan match hmabak pahnihah pawh chak kan tum ang," a ti.