Bundesliga champion tur Dortmund?

Bayern Munich an champion leh tho ang, tih ngawt theih a ni ta lo. Tunah chuan Bundesliga chu Borussia Dortmund kuta innghat a ni ta - khelh hmabak pakhat an la neihah Dortmund hi an chak a nih chuan an champion dawn.

Pathianni zan Bundesliga inkhelah Dortmund hian Augsburg chu 3-0 in an hneh, champion lai Bayern Munich chu Inrinni zan khan RB Leipzig lakah 3-1 in an chesual ve thung a ni.

German football inelna sang berah hian team 18 an awm a, league match 34 an khel ṭhin. Match 33 an khelh tawh chinah Dortmund hian point 70 an hmu a, anmahni hnaih bertu Bayen aiin point hnihin an sang - Bavarians tan champion tur chuan Dortmund chetsual chan a ngai dawn.

Bayern Munich an chak lo tih hresain Dortmund an inlan a, khualmuala inkhel ni mah se an brouak a fuh. Minute 38-naah Felix Uduokhai chu Donyell Malen laka a chet dan fuh lo vangin hnawhchhuah a ni.

Player tam zawk Dortmund an phur zual a, striker Sebastian Haller chuan second half-ah goal hnih a khung a, hun tawp dawnah Julian Brandt chuan an goal thumna leh chak nemnghehna a khung belh bawk.

Dortmund hi an champion thei a nih chuan kum 2011-12 season hnua Bundesliga title an lak leh hmasak ber tur a ni dawn. Bayern Munich erawh a zawna vawi 10 an champion tawhna chu a tawp rih dawn - Julian Negalsmann bana Thomas Tuchel an lak hnuah an la che fuh meuh lo.