Andy Murray a inhnukdawk

May 28 aṭanga khelh ṭan tur French Open-ah Andy Murray hmel kan hmu dawn lo. British tlangval hian clay court inelna lian hmachhawn ai chuan Wimbledon lam atana rilru pek tlang a thlang ta zawk a ni.

Kum 36 mi Murray hi a vanglai pawhin French Open-ah a che ṭha teh vak ngai lo a, a inkhelh thiamna hmun a ni lo - hliam leh harsatna dangin a tlakbuak ve reng bawk a, kum 2017 hnuah Paris khawpuiah hian a la inkhel leh lo.

World number 1 hlui Murray chuan, "Ka taksa dinhmun pawh a ṭha chho pangngai ve viau, chutihrualin Wimbledon khelh hunah a ṭha thei ang bera inlan ka duh, chumi atan chuan tunah hian ka chawlh rih a ngai," a ti.

Clay leh grass court season hi a inhnaihchilh a, hun tepter takah hmanhmawh taka chet a ngai ṭhin. French Open a khel lo a nih chuan Murray hian June 4-11 chhunga khelh tur Queen's Club atan hun awl a nei thei dawn.

Kumin French Open-ah hian Rafael Nadal pawh hliam vangin a inkhel thei dawn lo, vawi 14 champion tawh hian kar hmasa khan Roland Garros a khelh theih loh tur thu hi a tichiang tawh.

Mipa singles player dang Nick Kyrgios leh hmeichhe lamah Ema Raducanu te pawh hliam vangin a inlan thei dawn lo. OS Open champion hlui Raducanu hi a ban hliam zai niin tunah hian a chawl mek a ni.