Ronaldo tan thiam thil 'show' a hun

Cristiano Ronaldo-a'n a kum a tam hnuah Juventus a pan a, chona thar a hmachhawn duh vang a ni. Chu chona chu 'Champions League' a nih ngeia ngaih a ni - zanin dar 12:30 hian Allianz Stadium-ah Lyon an mikhual ang.

Last 16 first leg-ah Juve hi 1-0 in an chak lo, quarterfinal lut tur chuan goal khat aia tam an khung ngei a ngai dawn. Ronaldo leh a ṭhianten thapui an thawh a ngai dawn, goal an khung lo a nih chuan an zinkawng a tawp dawn.

Maurizio Sarri kaihhruaina hnuaiah Serie A champion an ni a, an sulhnu a ṭha. Amaherawhchu, mahse tia sawi zui a ngai, tun hnai season kua an champion chhunga point an hmuh tlem ber ṭum a ni a, goal an chhuah hnem ber season a ni bawk.

League bak nomawi chawi an la nei lo, Italian manager tan Champions League pawimawhna a sang zual hle, a dinhmun ti nghet tur leh Turin club ropuina nei let leh turin European champion nih an thlahlel takzet ang.

Sami Khedira, Mattia De Sciglio leh Douglas Costa te chu hliam vangin an inlan thei dawn lo, malpui hliam vanga match hnuhnung pahnih khel thei lo Paulo Dybala erawhin training a zawm pangngai tawh - Ronaldo a inpeih bawk.

Goal khatin hma an hruai a, minute 90 chhung goal an venghim thei a nih chuan Lyon an tlang dawn. Coach Rudi Garcia erawh a la ṭawng fimkhur hle. Garcia chuan, "Italy-a team ṭha ber chu Juve an la ni reng, an muala inkhel tur kan nih avangin rinkai lo zawk kan ni," a ti.

Ligue 1 an tihtawp hma avangin Lyon hi pasarihna an ni a, an dinhmunah an lungawi lo. Court-ah zualko mah se awmzia a nei thei si lo, season thara European football an khelh chhunzawm theihna kawng awmchhun chu UCL champion a ni, a awlsam dawn lo hle.

Team nem zawka ngai Lyon hian beisei erawh an la nei. Neymar leh Mauro Icardi te awmna Paris Saint-Germain chu League Cup final-ah goal khungtir loin an veng tluan thei, penalty-ah chak zo ta lo mah se Juve lakah pawh tlarhnung lam an inrem phui leh viau tura ngaih a ni.

Manchester United leh Real Madrid tan league bakah Champions League a chawi a, mimal lawmman tam tak a lak hnuin Ronaldo-a'n Juventus a zawm. Serie A club a zawm hun lai khan Juve hi a zawmin vawi sarih an champion thei, a awm hnuah vawi hnih an champion leh tawh.

Italian football roreltu hian 1996 hnua a vawi khat nan Europe-a hlawhtlin an duh, UCL-a a changtupa tih ngam Ronaldo an lakluh chhan chu a chiang. Portuguese forward hian season kal laia inelna hrang hrangah a club tan match 45 aṭangin goal 35 a khung, innghahna tlak a la ni reng.

Ronaldo chungchang sawiin Juve keeper Wojciech Szczesny chuan, "Tlarhnung khawng leh khauh tak pawh a lo paltlang tawh ṭhin, tunah hian thil mak ti turin a inpeih leh tawh," a ti. Ronaldo hi league match hnuhnung berah hahchawlhtir a ni a, zaninah tha tharin a khel dawn.