Thunder lakah Lakers an tlawm

Nimin zing NBA regular season inkhelah Oklahoma City Thunder chuan Los Angeles Lakers chu 105-86 in an hneh a, season kal laiah Lakers hian match khat bika point an hmuh tlem ber ṭum an tawng.

ESPN Wide World of Sports Complex-a inkhelah Thunder tan hian Chris Paul chuan point 21 a nei a, rebound vawi sarih a lak bakah assist vawi ruk nei bawkin hnehna an chan theih nan a thawh hlawk hle.

Lakers erawh an che fuh tawk lo, 3-points neih tuma vawi 37 an vawm zinga panga chauh a hlawhtling a, 2017-18 season aṭanga chhutin 3-point an neih tlem ṭum an tawng hial. Chak lo mah se Lakers hi Western Conference-ah hmahruaitu an ni chiang tawh, playoff-ah chuan an table-a pariatna nen an inhmachhawn ang. Hnehna changtu Thunders hi panganaah an awm mek.

Inkhel dangah Philadelphia 76ers, Toronto Raptors, Denver Nuggets, Utah Jazz leh Boston Celtics ten hnehna an chang ve bawk a ni.