Arsenal-in hna thawk 55 ban dawn

Coronavirus chuan nghawng na tak a nei mek zel. FA Cup an champion aṭanga ni tam a liam hmanin Arsenal chuan an club tana hnathawk mi 55 an ban tur thu an puang, hri leng vanga sum leh pai a harsatna an tawh vang a ni.

Gunners head of football Raul Sanllehi leh manager director Vinai Venkatesham te chuan hna thawk an ban tur thu hi an tarlang a, kum 134 chunga an club-in hun harsa leh khirhkhan ber an tawn ṭum a nih hial thu an a sawi bawk.

North London club-in hna thawk an ban tur zinga tam tak hi player zawngtu (scout) an nih hmel. Club-in neitu thar Stan Kroenke an neih hnuah kalphung ṭhenkhat an thlak a, player an zawn dan a danglam tak avangin an mamawh loh leh club nghawng na lo tur nia lang ho ban an tum.

Thuchhuah siamin Arsenal chuan, "Sumdawnna, inkhel entu leh kawng hrang hranga kan chet velna ṭangin sum hmuh a tlahniam. He harsatna hian season tharah pawh na takin a nghawng dawn niin a lang, hetiang thutlukna duhawm lo tak hi harsa taka siam a ngai," a ti.

FA Cup champion hian hnathawk rawihna tur sum an duh khawp an nei lo a, an duhna lamah erawh pawisa an nei tho niin a lang. Chelsea aṭangin winger Willian chu hlawh ṭha tawk tak pek tumin lak an tum mek, captain Pierre-Emerick Aubameyang pawh kar khata pound 300,000 hlawh turin an thlem mek nia sawi a ni.