Champions League khel tur Newcastle United
Newcastle United chuan season tharah Champions League an khel dawn, kum 20 hnuah European football inelna sang berah hian an kir leh dawn tihna a ni - Eddie Howe leh a naute hnathawh hian fak a phu.
Newcastle hi an mikhual Leicester City nen 0-0 in an inhnehtawk a, inkhel thunun tak chungin goal an khung thei lo. Goal khung lo mah se Magpies hian point khat an hmuh belh avangin palina aia hniamah an awm thei tawh lo.
Pangana Liverpool aiian Newcastle hi point liin an sang zawk a, season tawp hmain match khelh hmabak pakhat bak an nei tawh lo. Match hnuhnung berah Chelsea hneh lo pawh ni se Reds tan Magpies hi umphak theih an ni tawh lo a ni.
A goal lo
Thawhṭanni zan St. James' Park-a inkhelah mualneitu Newcastle lamin ball an chang tamin inkhel an thunun hneh hle a, ball possession pawh 78% tehmeuh an nei - Callum Wilson, Miguel Almiron leh Alexander Isak ten hun ṭha an hlah vek.
Second half-ah Bruno Guimaraes chuan woodwork a tih per a, a vanneih zan a ni lo. Tun hnai a match hnuhnung 10 aṭanga goal 11 khung thei Wilson meuh pawh goal hmaah a vannei tlat lo - a teuhah an thamral.
Hun tawp dawnah Foxes lamin Timothy Castagne hmangin remchang an nei a, mahse goalkeeper Nick Pope chuan a lo dansak hlauh. Dean Smith-a nauten point khat an hmuh avangin inhamtang turin beisei an la nei ve zel.
Hmasawnna
Eddie Howe-a'n Newcastle United a enkawl tirh khan, a tan Champions League chu duhthusam mai a nih thu a sawi. A hunlai khan table-ah a hniam ber dawt an ni a, tla mai thei dinhmuna ding an nih avangin UCL chu a sang lutuk.
November 8, 2021 khan Magpies a enkawl ṭan a, zawimuangin hma a sawnpui. Sum nei mah se player hrawl leh hlawh hnem tak tak tur a lei khawm pawp pawp lem lo, an chak tawk lohna lai thuam chak thei tur a zawng.
EPL-ah chuan English player an pawimawh ṭhin tih a hria. January bazarah pound maktaduai 85 a seng a, a player lei zingah defender tawnhriat nei ṭha Kieran Trippier pawh a tel - tlarhnung a rem phui ṭha hi tun dinhmun an thlen theih chhan langsar a ni.
Hello UCL
Champions League-a Newcastle inlan hnuhnung ber chu 2002-03 season daih tawh kha a ni a, kahtih laia an coach chu Sir Bobby Robson niin an captain pawh Alan Shearer a ni, kum 20 liam ta a nih avangin thawnthu hlui an chang tawh.
Magpies manager Howe chuan, "Zep tur a awm lo, a sang zual pali zinga tel phak hi a tirah khan kan beisei ngam lo. Chutihrualin duhthusam leh suangtuahna chu kan nei a, chumi a rawn thleng ta mai chu a lawmawmin rin pawh a harsa.
"Season hmasa kha chuan tlak hniam hlauh lai kan nei hial a nih kha, tun season chhunga team nghet tak kan indin theih dan hian min ti lawm a, kan hmabak pawh a phurawm takzet," a ti a, player lei leh hralh chungchang erawh a la sawi lo.
Tla thei Foxes
Khawvel mak tih turin Premier League nomawi an chawi nawlh a, kum tam pawh a liam hmain Leicester City chu English football inelna sang ber aṭanga tla thei dinhmunah an ding leh ta der mai - beiseina erawh tlemte an la nei.
Foxes hian point 31 chauh an la nei a, tunah chuan tla thei dinhmunah an la ding - season khar niah West Ham United an mikhual dawn. Hammers hi Europa Conference League final khelh hmabak an ni a, an indahṭhat chuan Leicester tan beisei a sang zual ang.
Mahse, Brendan Rodgers thlaktu Smith-a naute tan chak ringawt a tawk lo, an chunga awm Everton chetsual an chan tel a ngai. Everton, Leicester leh Leeds United zinga pahnih an tla dawn - a him awmchhun nih an tum dawn.