Vawiinah team lian an inlan dawn

LBS Suzuki 21st Inter Branch YMA Football Tournament-ah vawiin hian football thiam veng ṭhahnem tak an inlan dawn a; khelmual pathum 1st Bn. MAP Ground, MFA Ground leh Lengpuiah football hmuhnawm thlir tur a awm vek dawn.

Armed Veng-ah team ṭha

Kawnpui Jt hi an ṭha ṭhin a, tun ṭumah hian eng nge an an dawn la hriat loh mah se Maite lakah chuan rinkai zawk an ni. Salem Veng hi tun inelnaa team ṭha ber tur zinga mi an ni a, FC Venghnuai coach Lalrindika Hmar enkawl niin Phuldungsei Phul Bial tan goal venhim ṭhat a pawimawh ang.

Durtlang hian CYMA Football-ah nomawi la chawi chiah lo mah se final ṭum hnih an lut tawh a, Red Ribbon Football-ah an champion tawh thung. Nikum All Mizoram Inter Village Football-ah khan player ṭha kawl ṭeuh siin an tla nghal a, kuminah erawh champion ngei an tum. Mahse, Durtlang hian match hmasa bera chiang taka chak Zokhawthar an hmachhawn ang.

Champion lai inlan dawn

MFA Ground, Sairang Dinthar-ah champion lai Chanmari an inlan dawn a, MPL club nei veng hian Sakawrtuichhun an hmachhawn dawn. Chanmari hi tawnhriat nei player Rochhingpuia leh Lalrinchhana Tochhawng ten an la ho thei dawn a, ISL player Jerry Mawihmingthanga leh Lalrinliana Hnamte te an kawl bawk.

Kum 2005 champion Republic Vengin first match-a goal 13 ngawt khung thei Lamzawl an tum dawn a, Aizawl FC forward R. Lalthanmawia'n (Amawia) match hmasa berah Lamzawl tan goal kua a khung nghal! Republic Veng hian Amawia veng tur hian I League club lama a khelhpui Lalmuanawma (Munez) te an kawl thung a, inkhel hmuhnawm a beisei theih ang. Sairang Dinthar-ah hian Piller leh Sihphir te an inlan dawn bawk.

Lengpuiah football tak tak

MSSC Ground, Lengpui-ah YMA Mission Veng leh Maubawk ten match hmasa ber an khel dawn a, chil tiput tham a la ni lo. Maubawk hi team ṭha zawka ngaih theih an ni. Inkhel en châkawm tak erawh match hnihna aṭangin a inṭan dawn a, coach langsar Lalsangzuala Hmar enkawl Bethlehem Vengthlangin Cherhlun an hmachhawn dawn.

BVT hian coach chauh ni loin player pawimawh an nei ṭha a, K. Lalṭhathanga (Puitea) leh PC Laldinpuia te awmna team hi chu an khauh dawn tih a chiang. Cherhlun lam hian Aron Vanlalrinchhana leh KC Larchhuakmawia te an kawl a, BVT tan pawh chetsual theihna an ni ang.

Zemabawk North-in match hmasa berah Chhinga Veng an lehthal a, David Lalrinmuana'n a class sanzia pholangin freekick aṭangin goal hnih a khung. Vawiin hian David-a leh a ṭhiante hian seeded team ITI Veng an hmachhawn dawn a, chak tur zawk rin thiam a

har hle.