Ka beidawng ve ṭep ṭhin - Isak Ralte

Odisha FC forward, Indian Super League khelh zawh taka hero of the match-a vawi hnih thlan Isak Vanlalruatfela chuan ISL-a a season hmasa berah a beidawn hman thu a sawi chhuak.

Thingsulthliah tlangval, Bawngkawna seilian Isaka chuan, "ISL club-in min duh tih ka hriat kha chuan ka hlim takzet a, ka nu leh pa te hlim dan tur chu ka rilrua lo awm hmasa ber a ni.

"Mahse, ISL-ah chuan beisei ang ngawtin thil a lo awlsam lo a, khelhna hmun ka chan hleihtheih loh avangin ka beidawng hman hle a ni," a ti - Isak-a hian ISL-a a season hmasa berah hian match hnih chiah a khel a, minute 28 bak khelmualah hun a hmang lo.

Mahse, 2021-22 season-ah khel tam hretin, match nga a khel a, ISL-a a goal hmasa ber a khung bawk. 2022-23 season a herchhuah meuh chuan, hliam vanga talbuai lai nei mah se match 10 a khel a, goal hnih khungin assist vawi hnih a nei.

Hei chauh a ni lo - hero of the match-ah vawi hnih thlan a ni a, 'Pocket Rocket' hming lem an pek hian February khan Emerging player of the month chawimawina a dawng bawk - Odisha player zinga he chawimawina dawng thei hmasa ber a ni.

February-a Odisha-in 1-0 a Hyderabad an hneh ṭuma a goal mawi zet avanga goal of the week dawngtu Isak chuan, "Match khel lo a, beidawng em ema ka awm lai khan Odisha-a ka khelhpui Jerry Mawihmingthanga leh Daniel Lalhlimpuia te hian min fuih nasa ṭhin hle.

"ISL-a season hmasa ber chu a harsat thu te, dawhthei tura min duh thute min hrilh ṭhin a, chu chuan min pui a ni," a ti. MPL8-a best forward-a thlan Isak-a hian a professional career-a a zingkawng ngaihnawm hi, "John-a nen Khelmual titi" tih programme-ah a sawi chhuak a, he programme hi zaninah Zonet chuan en theih turin an pe chhuak dawn.

Zan dar 8:00-ah Zonet Rihnimah tihchhuah a ni ang a, zan dar 9:30-ah Zonet Zawlbukah chhuah nawn niin, Zonet YouTube member tan YouTube lamah en theih a ni dawn bawk. He programme hi Engmawi Agency - Frozen Foods, Venghluiin an sponsor a ni.