Lakers hnehin Nuggets an tlang

Denver Nuggets chuan a vawi khat nan NBA Finals an khel dawn! Nimin zing khan Nuggets hian Los Angeles Lakers chu 113-111 in an hneh a, best of seven series chu 4-0 a lain NBA Western Conference champion an ni.

Nikola Jokic hoa khel Denver Nuggets hian game hmasa pathum an lak avangin chak tura rinkai an ni. Mahse, LeBron James leh a ṭhianten thapui an thawh a, chawlhlawk lai chuan Lakers lamin point 15 zetin hma an hruai fal.

Lakers tan an hmahruaina hi a sang tawk zo lo, quarter thumna bikah Nuggets lamin 36-16 tehmeuhin an lehthal a, quarter hnunung berah hniam leh hret mah se Jokic leh a ṭhiante an dingchang tlang ta tho.

Nuggets hian Miami Heat leh Boston Celtics inkhela chak zawk nen NBA Finals an khel dawn. Eastern Conference Final-ah Heat hian 3-0 in hma an hruai fal mek a, tukin hian game 4 an khel ang. NBA Finals hi June 1-18 chhunga khelh tur a ni ang.

NBA Most Valuable Player vawi hnih ni tawh Jokic chuan, "Kan beidawng ngai lo tih hi tun hnai kum nga chhung chu ka sawi tawh, ka thu sawi dikna chu tun game 4-ah hian chiang takin a lang.

"Inkhel tir lamah khan keini aiin an ṭha zawk a, min nawr nain kan dinhmun pawh a chhe hman hle. Mahse, inkhel chawhnu lamah kha chuan thawnthu hran kan ziak a, mimal ni loin team hnathawh a ni," a ti.