Juventus point an paihsak

Player lei chungchanga dan an bawhchhiat avangin Juventus chu point 10 an paihsak. Point an paihsak avang hian Serie A table-ah pawh pasarihnaah an tlahniam nghal - season thara Champions League khelh beiseina a thamral tluk a ni.

Thawhṭanni zan khan Old Lady hremna hi an puang a, hremna thu a chhuah hnuah Empoli nen inkhelin Juve hi 4-1 in an tlawm zui - Massimiliano Allegri leh a naute tan vanpui a chim a ni ber mai.

Italy rama football thuneitu sang Italian Football Federation (FIGC) tarlan dan chuan, kum 2019 aṭanga 2021 chhung khan Juve hian player an lei dan chungchangah, an sum hman leh lakluh inziahna lem an siam a, euro maktauduai 60 vel laiin an ziak dik lo.

He an thil tih avang hian January thla khan point 15 paihsak an lo ni tawh, mahse Italy rama infiamna lama thuneitu sang Olympic Committee (CONI) hnenah an zualko a, anni hian April thla khan an point paihsak tawh hi an pe let.

Mahse, thil thleng dan hi ennawn leh niin hremna hran hi a chhuak leh ta tho. Juve dan hremi chuan point 15 paihsak aiin point kua paihsak tal turin a ngen a, a ngen ang thlapin tihsak ni lo mah se hremna chu an tihnepsak ta deuh.

Juve vice chairman ni ṭhin Pavel Nedved bakah mi pawimawh dang - Paolo Garimberti, Assia Grazioli Venier, Caitlin Mary Hughes, Daniela Marilungo, Francesco Roncaglio leh Enrico Vellano te chu thiam loh chantir niin Nedved bik hi thla riat chhung atan hrem lai a ni.

Thubuai chhui a nih tirh khan thuneitu tam zawk chuan an nihna an bansan. Tunah hian hun rei tak chhung Juve chairman ni tawh Andrea Agnelli, ex-chief executive Maurizio Arrivabene leh sporting director pahnih Federico Cherubini leh Fabio Paratici te an chungchang ngaihtuah a la ni dawn.

Juventus hian Serie A khelh hmabak pahnih an la nei, an hmabakah hian chak ve ve pawh ni se an chunga mite pathum an chesual ve a nih ngawt loh chuan season tharah UCL an khel phak dawn lo - AC Milan leh Udinese te an la tum dawn a ni.