Zanin dar 7:30-ah IPL Eliminator Lucknow Super Giants Vs Mumbai Indians

Indian Premier League elimnator chu zanin dar 7:30 hian M. A. Chidambaram Stadium, Chennai-ah khelh a ni dawn a, Lucknow Super Giants leh Mumbai Indians te an inkhel dawn. Tun season-ah IPL club-te a intluk tlang a, zanina chak zawk pawh hi champion hial ni thei tura theihna an ni ang.

Krunal Vs Rohit

Eliminator khel tur captain pahnih buk chuan Mumbai Indians captain Rohit Sharma buk a rit a, chutihrualin Lucknow captain Krunal Pandya hi dah hniam a rem lo.

KL Rahul inhliam vanga captain hna chelh lailawktu Krunal Pandya hi India tan pawh a inlan ve fo tawh a, amah hi Gujarat Titans captain Hardik Pandya u a ni.

Krunal hi all rounder a ni a, team chakna hnar tih tur chu ni lo mah se a ṭul dan a zirin mamawh chhanna a ni thei ang. Chutihrualin Rohit erawh a khelh fuh ṭumah chuan chelh theih loh ang hial a ni thung.

En châkawm

Mumbai Indians hian batting line up an nei ṭha hle. Captain Rohit kawppui turin Ishan Kishan an kawl a, Cameroon Green-a'n eliminator an khelh theih nan Hyderabad Surinsers lakah century a siam.

Suryakumar Yadav ṭhatzia sawi nawn a ngai tawh lo. SKY hian season bul ṭan ṭha tawk lo mah se tunah erawh a rawn che ṭha leh tawh a, Mumbai Indians-in tun hnai chho 200 runs an vuak kai fona chhan pakhat a ni.

Lucknow-in KL Rahul inhliam vanga an chan hi a pawi a, chutihrualin Marcus Stoinis, Kyle Mayers leh Nicholas Pooran te hi chakpui tham an ni pha tho.

Cricket-ah mimal langsar ṭhin bawk mah se infiamna dang ang thoin team anga ṭhat a pawimawh. Mumbai hi table-ah palina zawk ni mah se player aṭanga thlirin an buk a rit zawk a, Lucknow tan hnehna chang turin an chet ṭhat rual a ṭul dawn.

May 16 kha team pahnih inhmachhawn hnuhnung ber a ni a, Lucknow hian 177 runs an siam chu Mumbai lakah a hum thei tlat. Hemi a thlen theih nan hian bowler pahnih Yash Thakur leh Ravi Bishnoi te an ṭangkai a, anni pahnih hian India tana sulhnu ṭha chhuan tur an la nei meuh lo.