US Open champion lawmman a hniam dawn

Tun thla tawp aṭanga khelh tur US Open-ah season hmasa aiin kuminah singles champion ten pawisa an dawn tur a tlem zawk dawn. First round khel phak chin tena an dawn ṭhin erawh a pung thung ang.

Season hmasa khan US Open singles champion hian $3,850,000 (Rs nuai 2885) an dawng, kuminah chuan tih hniam hret niin mipa leh hmeichhe champion hian $3,000,000 (Rs nuai 2247) an dawng dawn a ni.

Covid-19 vangin inelna hi a hmuna entu awm loin khelh a ni dawn a, inkhel en man aṭanga pawisa hmuh tam tak bakah sumdawnna lam thlengin season danga an sum hmuh ṭhin ang an hmu phak dawn lo.

Sum che vel hi a tlahniam vak chuang lo tura ngaih a ni a, player langsar leh thleng sang ṭhinten an dawn tur a hniam hret laiin player langsar lo leh tla hma ṭhinte dawn tur erawh a pung hret ve thung a ni - hripui leng vangin kalphung an siam danglam hret.

Season hmasa khan first round khel phak chinte hian $58,000 (Rs nuai 43) an dawng a, kuminah hian 5% a tih pun niin $61,000 (Rs nuai 45) an dawng ang - qualifying paltlang chin tan chuan lawmman ṭhahnem tak dawn tur a awm tihna a ni. Mipa champion lai Rafael Nadal leh hmeichhe world number 1 Ashleigh Barty te chu New Yourk khawpuiah hian inkhel turin an kal dawn lo tih a chiang tawh a, coronavirus vanga buaina hi a la fel loh avangin player ṭhenkhat pawh an la inhnuhdawh leh a rinawm.