Khawzawl Vengthar leh Armed Veng an chak

LBS Suzuki 21st Inter Branch YMA Football Tournament-ah nimin khan team ṭha Khawzawl Vengthar leh Armed Veng ten hnehna an chang a, team ṭha pahnih leh Bairabi Jt ten last 32 an lut.

MSSC Ground, Muallungthuah Khawzawl Vengtharin team ṭha an nihzia an pholang a, Aizawl Venglai lakah 4-1 in hnehna an chang. Nimin inkhel an inhnehtawk a, hun rei zawk 1-1 ni mah se hun tawpah team ṭha zawk Khawzawl Vengtharin hun tawp lamah goal thum an khung a, chiang takin an chak.

Rinlawk ang ngeiin Armed Veng leh Hlimen inkhel a hmuhnawma , Hlimen vanduaina chu champion ngun ber Armed Veng an hmachhawn hi a ni. Armed Veng tan Lalawmpuia Hnamte-in (Opitea) box pawn aṭangin kawh zetin a pet goal a, Hlimen-in Vanlalthasanga hmangin sut mah se Lalramchullova'n freekick aṭangin hmahruaina goal a khung a, Lalbiakhlua'n chak nemnghehna goal a khung leh bawk.

Bairabi Jt-in last 32 lut turin Kulikawn 2-1 in an hneh a, goal hnih an khung hmasak zawk bakah chak phu zawk an ni. Inkhel dangah Falkland tan T Shalom Lala a che ṭha a, Chiahpui 4-2 in an hneh. Armed Veng Branch YMA-in Chiahpui jersey hak tur hi an ngaihtuahsak.

Keifang Venglai leh Chhuanthar Tlangnuam te hun rei zawk an inhnehtawk a, injury time-ah Daniel Lalliana'n chakna goal a khung. Armed Veng-a inkhel tawp berah Zuangtuiin Edenthar 2-1 in an hneh.

Inkhel dangah Lengpui Model, Lungdai, Thenzawl Jt, Seling leh Thingsulthliah Jt ten hnehna chang turin goal ṭhahnem tak an khung vek a, Dawrpui Vengthar erawhin Thingdawl Vengthar hneh turin an mamawh tawk goal khat an khung thung.