Vinicius-a chunga thil thleng Real-in an report

Real Madrid chuan an player chhuanvawr Vinicius Jr chunga chi inthliarna lam hawia thil thleng chungchangah dan angin hmalak an tum a, sorkar thuneitute hnenah thil thleng chu an report thu an sawi.

Pathianni zan khan Valencia khelmualah Real an leng a, Vinicius hian nasa taka chhaih nawmnah tawkin, referee hnenah a chunga fan-te chet dan hi inkhelh laiin a report hial.

Mahse, referee hian rei lotê bak inkhel hi a tihtawp phah lo a, inkhelh zawhah Real Madrid coach Carlo Ancelotti chuan referee-in inkhel a titawp lo chu mak a tih thu a sawi.

Real hian Vinicius chunga thil thleng hi 'hate crime' (chi bing/sakhua inhuatna avanga hleihlenna) tiin an report a, Spanish dan lam thuneitute chuan chhui zui chi a nih leh nih loh an thlir phawt ang.

Hei le Brazil

Kum 22 mi lek ni chungin Vinícius-a'n ram tan match 21 khel tawhin goal hnih a khung a, khawvela player ṭhangduang ber pawl ni mek hi ram tan a la hlu dawn chauh - hemi hrechiangtu Brazil sorkar pawh an fapa chhan turin an lo lang vat a, hun harsaah Vinicius an hawisan lo.

Brazil chuan, "Pawmdam theih miah loh thil a thleng leh ta a, chi inthliarna lam hawi thil thleng fo mai titawp tura hmalakna a la awm miah lo hi hriatthiam harsa chu a ni," an ti a, Spain sorkar an dem.

Ministry of Foreign Affairs of Brazil chuan thuchhuah siamin, Spain sorkar pawh chak taka hma la tura an phut thu an sawi a, "Vun rawng vanga inhmuhsitna lantirtute hrem tur leh hetiang thil a thlen nawn tawh loh nana chak taka hma la turin kan ngen a ni," an ti.

Brazil sorkar chuan, "FIFA, Spanish FA leh La Liga pawh a ṭul anga hma la turin kan phut a ni," an ti a, Spain prime minister Pedro Sanchez chuan, "Football-ah chi inthliarna a thlen kan rem ti tur a ni lo. Dawtheihna leh inzahtawnna hi infiamna innghahna lungphum chu a ni a, inhuatna leh ram dang mi ngaihtheih lohna hian football leh kan khawtlangah hmun a chang tur a ni lo," a ti.

Infantino thu leh hla

FIFA president Gianni Infantino chuan, "Sawi ringawt lo a, a taka kan thawh a hun ta," tiin chi inthliarna do tura ke pen a ṭul thu a sawi a, chumi atana tih tur ṭul leh pawimawh a tihte a pholang bawk.

Infantino chuan inkhelh laia chi inthliarna thleng a awm a nih chuan inkhel tihtawp phawt, a thlen nawn chuan tihtawp leh a, a tawpah chuan khelh chhunzawm loh tawp a rawt a, school lamah zirtirna uar a ṭul thu a sawi bawk.

FIFA hotupa ber chuan chi inthliarna thil thleng avanga inkhelh chhunzawm theih a nih loh chuan, chu thil thlen tirtu club lam chu chak lo zawka puan a rawt a, khawvel huapa stadium tlawh phal loh, thiam loh chantirte chu thubuai siamsakte a tel.

Infantino duhdan ang hian kal thei ta chiah se, beisei angin chi inthliarna hi a tlem deuh zawk a rinawm - a titheitu langsar erawh FIFA tho an ni a, an hmalak zui zel dan khawvelin a thlir ang.

Thukhawchang

Barcelona coach Xavi chuan, "Inkhel tihtawp mai tur. Vawi khat chauh pawh thleng se, kan vaiin kan haw mai tur a ni," a ti a, inkhelh laia chi inthliarna lam hawi thil a thleng a nih chuan inkhel tihtawp hmak a duh.

Real Madrid chuan, "Kan player Vinicius Junior chunga thil thleng avang hian kan lawm lo takzet a, a he thil thleng hi na takin kan dem a ni," an ti a, thil thleng chu Spain dan leh hrai zah lohnaah an ngaih thu an sawi bawk.

La Liga chuan thuchhuah siamin, thil thleng chu an zirchian tur thu an sawi a, chi inthliarna a thleng ngei a ni, tih finfiahna a awm chuan dan anga hma an lak tur thu an sawi a, thil thleng lai video-a lo nei an awm a nih chuan an hnena thehlut turin an ngen bawk.

Valencia chuan thuchhuah siamin, chi inthliarna lam hawia che fan pakhat chu an hmuhchhuah tawh thu sawiin, "Club chu police te nena thawk hoin, mawi lo taka che midang man turin theihtawp a chhuah a ni," an ti a, fans an man chhuahte chu na taka an hrem tur thu an sawi.

Vinicius & Tebas

Football khawvelin Vinicius a thlawpna nasa takin a tilang a, hetihlai hian a khelhna league-a hotupa ber, La Liga president Javier Tebas erawh Vinicius-a thusawiah a lawm lo a, twitter lamah Brazilian forward nen hian an inchhang!

Vinicius hian Valencia nena an inkhelh zawhah khan, "Ronaldinho, Ronaldo, Cristiano Ronaldo leh Lionel Messi te tual chaina ṭhin chu, midang hmuhsit chingten nuam ti taka tual an chaina a chang ta. Hei hi a vawi khatna a ni lo a, a vawi hnihna emaw a vawi thumna emaw pawh a ni lo," a ti a, La Liga chu chi inthliarna avanga thil thleng ngaizam ṭhinah a puh bawk.

Mahse, Tebas chuan, "La Liga i dem hmain thil i zirchian phawt a ngai a ni," tiin Vinicius hi a chhang a, La Liga President chuan chi inthliarna thleng ṭhin tihbo nana inhmuhkhawm an rawtah Vinicius chuan ṭum hnih ngawt a ṭhulh thu a sawi bawk.

Hetihlai hian Brazilian forward chuan La Liga hotupa chu chi leh chi inkara huatna thlen ṭhintute aia amah bei zawkah a puh a, La Liga chu thil thleng ṭhinah hremna lekkawh tura a beisei thu a sawi.

Tebas an sel

La Liga hotupa Tebas chuan, "Mi zawng zawng ngaihngam taka an awmna, club 42 aṭanga mihang player 200 te kar tin fan-ten lawm taka an lo lawmna hmun hi mualpho taka chhuah kan phal lo a ni," a ti a, "Chi inthliarna hi a thleng khat hle - tun hnaiah vawi kua vel chiah report a awm," a ti bawk - Spanish league zahawmna hum a tum.

Mahse, Spanish football-a thuneitu sang ber Royal Spanish Football Federation (RFEF) president Luis Rubiales chuan Brazilian Football Confederation (CBF) president Ednaldo Rodrigues chu an office-a leng tura sawmin, "Tebas-a thusawi hi chu mênah thlak rawh," a ti!

Rubiales chuan, "Chi inthliarna chungchangah hian zirtirna kan la mamawh hle," a ti a, "Kan tum ber chu chi inthliarna tuar ṭhin ten, 'Spain-ah chuan chi inthliarna a awm miah lo,' an tih hun hi a ni," a ti a, Tebas-a thusawi chu pai dam har tak a nih thu a sawi bawk.

RFEF hotupa chuan an rama thil thleng ṭhin avang chuan, an league-in player an la chân theih thu sawiin, "World Cup 2030 thlen kan tumna pawh kan rama thil thleng ṭhin avangin duh lotu an awm phah thei," a ti a, an ram chu a insiamrem ngei a beisei.