Hma hun êng taka thlirtu Virgil van Dijk

Liverpool defender Virgil van Dijk chuan Champions League khel lo thei dinhmunah ding mah se, Liverpool hma hun chu êng taka a thlir thu a sawi a, season thar a thlir der tawh.

Reds hian an league match hnuhnung berah Aston Villa chu 1-1 in an inhnehtawkpui a, top four ni tura an elpui Manchester United leh Newcastle United tan season thara CL khel turin hmabak match hnihah point khat bak hlawhchhuah a ngaih tawh loh phah.

Mahse, heti chung hian VVD chuan season thar atan beiseina sang tak a nei a, European football-a club inelna sang ber khel dawn lo pawh ni se, player ṭha an hip loh phah a ring lo.

Dutch defender VVD chuan, "Mi zawng zawngin kan insiamrem mek tih an hria. Player hmabak êng tak nei niin, Liverpool-in min rawn sawm ta se, ka lawm ngawt ang," a ti a, a khelh mekna club chu a la dah sang hle.

VVD chuan sawi zawmin, "A sang pali zinga tel loh hian danglamna a thlen ka ring lo. Mahse, miin Champions League khelh an duh a nih pawhin, an hmachhawp a ni ve a ni mai," a ti a, player ṭha an la hip reng a ring.

Reds hian nipui transfer-ah contract hmang zo tur Roberto Firmino, James Milner, Naby Keita leh Alex Oxlade-Chamberlain te chu contract thar ziahpui loin, an chhuahtir dawn a, an insiamrem dawn tih coach Jurgen Klopp chuan a lo sawi tawh bawk.

Mahse, Liverpool ṭantuten an beisei em em Jude Bellingham erawh Reds hian lei an tum loh thu an tichiang tawh a, English midfielder hi duh viau mah se a lalut tura pound maktaduai 100 chuang sen a ngaih dawn avangin sum ngah tawk loah an inngai.

Liverpool hian Borussia Dortmund midfielder hi lalut dawn lo mah se, Brighton & Hove Albion midfielder Alexis Mac Allister nen sawizawm mek an ni - Argentina tana World Cup nomawi chawitu hi pound maktaduai 70 man vel ni turah ngaih a ni.

Liverpool hi season hmasa khan nomawi pali chawi thei dinhmunah hial an ding a, mahse, Premier League leh Champions League nomawi chawi loin, League Cup leh FA Cup-ah chiah an champion.

Season hmasa lama an match ngah lutuk hi an tuar zui niin a lang a, tun season-ah beisei angin bul an ṭan lo - season tawp lamah league match sarih a zawnin chak mah se Villa an draw leh tak avangin awmzia a nei dawn lo niin a lang a, Europa League-ah lungawi zir a ṭul dawn.

VVD chuan season thar thlirin, "Kan hma hun atan, a bik takin season thar atan ka phur hle. Thla liam ta vela kan insiamrem ṭan aṭang khan he ngaihtuahna hian ka rilru a luah tawh a ni.

"Hnathawh tur tam tak chu a la awm ngei a, mahse, pre-season ṭha tak kan nei dawn a, chu chu kan ruahmanna a ni. Ka hriat dan chuan pre-season hautak zet kan nei dawn a, season hautak hmachhawn turin kan inbuatsaih dawn a, a phurawm hle," a ti.

Liverpool hian Germany-ah pre-season training nei turin ruahmanna an nei mek a, Singapore-ah an zin dawn bawk - hetah hian Leicester City leh Bundesliga club Bayern Munich te nen an inkhel ang.

Kum 31 mi VVD chuan, "Players ṭhenkhat an chhuak a, pre-season-ah engemaw zat an rawn luh belh theih ka beisei. He club rawn zawm a, min pui theitute chuan nasa takin min nawr kal dawn.

"Season thar atana kan hmachhawp chu, kan vaia inpeih a, club tana hnathawh a ni. Eng anga upa pawh ni ila, a pawimawh ber chu ṭha taka khelh a ni mai," a ti a, season thar atan a inbuatsaih.

Liverpool hian tun season-a an league match tawp ber chu May 28 zan dar 9:00 hian an khel dawn a, khualmualah tla tawh Southampton an hmachhawn ang.