UCL final referee tur Marciniak

Champions League final referee turin Szymon Marciniak ruat a ni. Europe khawmualpuia football thuneitu sang UEFA chuan Marciniak an ruat thu hi an tichiang tawh.

June 10, Inrinni zan dar 12:30 hian Manchester City leh Inter Milan ten Champions League nommawi an inchuh dawn. Final hi Ataturk Olympic Stadium, Istanbul, Turkey-ah khelh tur a ni ang.

Poland mi Marciniak hi tun season Champions League match pariatah referee a ni tawh a, heng zingah hian semifinal second leg-a Man City leh Real Madrid te inkhel pawh kha a tel.

UCL bikah chuan kumin hi final-a referee a nihna hmasa ber a ni dawn, an ram Poland aṭanga hetiang dinhmun chelh thei hmasa ber a ni nghal bawk. 2016 UCL final-ah khan fourth official dinhmun chu a lo chelh tawh a ni.

Kum 42 mi Marciniak hian inkhel enkawl hrim hrimah erawh tawnhriat a nei ṭha hle. Qatar World Cup final-a Argentina leh France an inkhelh ṭum khan referee a lo ni tawh a, tunah UCL final a ham leh dawn avangin football inelna lian leh pawimawh pahnihah referee a ni dawn tihna a ni.