Rossi-a'n kar tawp a nghakhlel

Valentino Rossi chuan tun kar tawpa Czech Republic Grand Prix an tlan tur a thir lawk a, tlan kawng Masaryk Circuit chu atan hmun nuam a nih bakah beisei a neih san thu a sawi chhuak.

Nikum khan Grand Prix of the Americas-ah Rossi hi pahnihna a ni, a hnu lamah hlawhtlinna sang tak a la chang leh lo. Bike intlansiakna sang berah hian dawhsan (podium) a lawm leh phak a nih chuan a vawi 200-na tur a ni ang.

Yamaha rider Rossi chuan, "Brno-ah kan intlansiak dawn, ka tan chuan he hmuna intlansiak hi engtik lai pawhin a hluin a nuam dangdai hle ṭhin. A tlan kawng a nuamin boruak hi a thiang ṭha thei em em bawk.

"Min ṭantu tam tak an awm ṭhin a, kuminah erawh a hmuna entu an awm thei lo tur hi a pawi ka ti takzet. Tlan kawng hrang hrang zingah ka ngainat leh mawi ka tih a nih avangin a nawmna erawh a bo lo turah ka ngai," a ti.

Czech Republic-ah hian Rossi hian sulhnu a nei ṭha hle. He hmunah hian 125cc leh 250cc huangah hnehna a lo chang tawh a, bike intlansiakna sang ber MotoGP-ah pawh 2003, 2005, 2008 leh 2009 te khan hnehna a lo chang tawh. Season kal laiah Rossi hian hnehna a la chang lo. Spanish Grand Prix-ah a tlan tluan thei lo a, intlansiak pahnihna Andalusia Grand Prix-ah erawh pathumna dinhmun a luah.