Man City defender thar Nathan Ake

Manchester City chuan Premier League aṭanga tla hlim Bournemouth aṭangin defender Nathan Ake an lalut. Dutch international hian Etihad Stadium-ah season nga daih contract a ziak a, a man zat chu pound maktaduai 40 a ni; pound maktaduai khata pung leh thei tur a ni.

Kum 25 mi Ake hian Pep Guardiola kaihhruaina hnuaia a khel tur chu a duhthusam a thleng dik tih a sawi. Ake chuan, "Pep hi khawvel puma mi hriat hlawh leh ngaihsan a ni a, a theihna leh thiamna chu a hnathawh aṭang hian a chiang mai," tiin Spanish manager a dah sang hle.

Man City hian tun nipui bazar chhungin winger Ferran Torres chu Spanish club Valencia  aṭangin pound maktaduai 21 in an lalut tawh bawk a, ani hi Leroy Sane hmun ruak luah tur a ni dawn - Pep Guardiola team hian squad an thuam chhah leh viau dawn niin a lang.

Nipui hmasa khan captain Vincent Kompany chuan City hi a chhuahsan, rinrawl Aymeric Laporte a inhliam chhungin Nicolas Otamendi leh John Stones te an khel ṭha tawk lo. League nomawi Liverpool laka an chan chhan lian tak ni pawhin a ngaih theih.

Tlarhnung phui tawk lo vangin Man City an buai a, a bik takin Laporte awm loh laiin tlarhnung lai a phui lo. Ake a luh takah chuan Stones leh Otamendi te nen khelhna hmun an inchuh ang.