Kan la tlang lo - Flick

Bayern Munich coach Hans-Dieter Flick chuan Champions League quarterfinal lut turin an dinhmun ṭha tawh viau mah se hna an la zawh loh thu a sawi a, a naute chu Inrinni zana an khingpui tur Chelsea lama rilru pe turin a fuih.

German champion hian last 16 first leg-ah Blues chu 3-0 ngawtin an luhchhuah thei a, second leg hi an mual Allianz Stadium-ah an khelh dawn avangin tlang chiang tura ngaih an ni. Mahse fans an awm dawn loh avangin tun hma lama boruak nen chuan a inang dawn lo.

Flick chuan, "Chiang taka hriat ngai chu kan khingpui tur hi Chelsea an ni a, kan tan hian quarterfinal hnai viau angin lang mah se kan khingpui tan pawh kawngka a la inhawng reng - a ṭha thei ang bera kan khelh a ngai dawn a ni.

"Inkharkhip hnuah Chelsea hian an khel ṭha thei hle a, manager ṭha takin a naute a kaihhruai dan pawh a ngaihnawm. Tlawm sain an rawn zin dawn lo tih kan hriat a pawimawh, chumi lo do let tur chuan keini lam pawh kan inbuatsaih a ngai," a ti.

Frank Lampard-a naute hi Premier League-ah palina an ni a, season tharah Champions League an khel leh dawn. FA Cup final-ah erawh Arsenal an ngam lo, kar khat hnuah German club lian an hmachhawn leh nghal dawn - tun hnaiah match an ngah avangin an tan inkhel hautak a ni ang.

Bayern Munich erawhin Bundesliga an khelh zawhna a rei tawh a, hahchawlhna hun an ngah. Nilaini zan khan Flick-a naute hi French Ligue 1 club Marseille nen friendly match an khel a, forward Serge Gnabry goal hmangin 1-0 in hnehna an chang a ni.