Champions League kan nghak chhuak leh ta City khelmualah Bale tel lohna Real Madrid

Covid-19 vanga chawlh a nih reng hnuah European football-a club inelna sang ber Champions League chu zanin dar 12:30 aṭangin khelh ṭan a ni leh dawn ta a, Manchester City chuan last 16 second leg-ah Real Madrid an mikhual dawn. 

Manchester City hian Santiago Bernabeu-ah 'meuh' hnehna changin Real hi 2-1 in an hneh tawh a, away goal an neihsa bawk avangin Spanish club tan tho leh tur chuan thapui thawh a ngai ang. 

City ṭhatzia kan hria a, Real hi an talbuai season-ah pawh Spanish champion ni thei an ni a, an nep lo - zaninah inkhel hmuhnawm en tur a awm nghal dawn a, inkhelh hma hauhin chanchin ngaihnawm hriat tur a awm nghal. 

Real boss Zinedine Zidane-a'n kawhmawh bawltu Gareth Bale a ngai pawimawh lo tih lantir chhunzawmin English football hrechiangtu player hi a squad-ah a telh duh lo a, Bale tel loin Etihad Stadium an lenglut dawn.

Manchester City-in Pep Guardiola tel lo pawhin Premier League nomawi an chawi thei tih Pep-a awm hmain an lo lantir daih tawh a, Spanish coach an lakluh chhan hi European champion nih an duh vang a ni. 

Season hmasa (2018-19) khan Liverpool-in Champions League nomawi an chawi a, City-in Premier League nomawi an chawi thung. Hemi ṭum hian Pep leh Klopp-ten fiamthuin an nomawi chu inthleng mai an hnial loh thu an sawi. 

Tun season-ah kum 30 hnua a vawi khat nan Liverpool-in Premier League nomawi an chawi ta ngei a, nomawi zawng zawnga an duh ber an nei ta - City erawhin an duh ber an la nei ve lo a, fiamthu kha a tak ram chantir a hun ta. 

Pep-a'n Champions League nomawi chawi ngei a duh dawn a, chumi tur chuan European football-a sulhnu nei ṭha ber Real an hneh phawt a ngai - he team hi an hneh phawt chuan champion tura inrintawkna an nei thei ang. 

City ṭhatna chu tlarhma tih loh rual a ni lo a, midfield en ila Kevin de Bruyne leh David Silva te ho an awm avangin thiamna lamah chuan an ngaihtuahawm loh tih a chiang reng. 

Pep-a naute hian Premier League khelh zawh takah khan an khingpui goal hnaih lamah vawi 10,068 zet ball an khawih a, European top five league-ah heti zat khingpui goal lama ball khawih thei an awm lo. 

A tawi zawnga sawi chuan City hian 'final-third' hi hun hman nan an hmang a, ball inpe kual chunga khingpui tlarhnung ṭhiah dan an ngaihtuah ṭhin - mahse hei tak hian counter attack aṭanga ball kal dawl zo tur defender ṭha a mamawh tir a, hei hi league-ah City hian an talbuai phah. 

Aymeric Laporte inhliam chhung zawngin City tlarhnung a pherh a, French defender dam hnuah an zia hret. Mahse, tlarhnung laia Laporte kawppui tur hi buaina a la ni tho - kum 19 mi defender Eric Garcia hi Covid-19 hnuah Pep-a'n a khelhtir nasa a, chutihrualin a tawnhriat neih tlemna hian Champions League match pawimawh meuhah chuan a ti kim ki deuh mai thei. 

Spanish champion tan  Karim Benzema chu innghahna tur a ni leh dawn a, French striker hian tun season-ah goal 26 ngawt a khung tawh avangin ven bik ngai a ni tih chu City-in an hai lo ang. 

Mahse, he striker hian Spanish ṭawnga 'socio' an tih, kawppui ṭha tak a mamawh - a nihna takah chuan Real hian La Liga nomawi chawi turin Barcelona tlakchhiat lai an nang tel tiin a sawi theih a, Benzema ringawt hi City laka 'comeback' nan a tawk lo. 

Zidane-a'n training naah Marco Asensio leh Eden Hazard chu Benzema thlawp tura a dah an ni - Asensio hian a hliam a dam hnuah a thiam thil a 'show' leh tawh a, Hazard erawh November hnuah minute 90 inkhelh tluan a la nei lo thung. 

Real tana pawimawh ber tia sawi ngam hial chu Hazard-a'n ngai a awh a ni a, season hmasaa Manchester City tlarhnung a chin phar dan ngaihtuah chuan Pep-a nauten hmachhawn nawn an châk lo ang tih a chiang.

Hazard hi kar tir lam khan Spanish chanchinbu lar Marca-a sports writer Santiago Siguero chuan a a ke rekah hliam tenau a nei niin a sawi a, mahse Zidane-a'n Real tana feh chhuak tur zingah a telh avangin buaina tur a awm lo niin a lang. 

Pound maktaduai 150 chuanga Real pantu hian La Liga nomawi chawi mah se mimal anga a khelh ṭhat loh avangin a career-a a season chhe ber a nih thu a sawi a, he boruak duhawm lo vai kiang tur hian Europe lamah a theihna pholan a mamawh. 

Hazard hi a khel thei lo a nih chuan Vinicius Jr. chu Zidane-a'n a koh tur a ni a, mahse Brazilian forward hi City nen an intawn hmasakah a hlawhchham avangin Zidane-a'n chhawr nawn a châk lo ang. 

First leg-ah khan Real hian Vinicius hnena ball vawrh a, chumi hmanga City tlarhnung ṭhiah chu an tum a ni a, an hlawhchham -  Kyle Walker-a'n Brazilian rawlthar hi a lo nau chei a, a dah ṭha. Hriat tel tur erawh kha match hnuah khan Vinicius-a'n ngai a awh leh tawh.

City boss Pep Guardiola-a'n a striker inhliam  Sergio Agüero a chhawr theih loh tur thu a sawi a, Argentine striker tel lo tur hi City tan channa a ni. Chutihruala hriat tel tur chu first leg-a hnehna an chan khan City hian Aguero an chhawr thei lo tawh. 

Santiago Bernabeu-ah Pep-a'n 4-4-1-1 formation hmangin Bernardo Silva leh KDB chu tlarhmaah false nine angin a hmang a, striker pangngai Gabriel Jesus chu mual sirah rin loh takin a dah thung - mahse hei hi a thawk a, Jesuse leh KDB (penalty) ten goal an khung. 

Real Madrid hian first leg-a a red card hmuh vangin an captain chhuanvawr Sergio Ramos an chhawr thei dawn bik lo a, hei erawh City-in Aguero an chan aia nasain Real hian an tuar thei - English club tan chuan chanchin ṭha a ni. 

Ramos hian a khel thei dawn lo chungin England-a zin tur squad-ah erawh Zidane-a'n a telh tho a, hei hian team chhungkuaa Spanish defender pawimawhzia a hrilhfiah - dressing room boruak chhem nung tur talin Zidane-a'n a duh.