Zaninah Manchester United hma hun a chiang dawn?

Manchester United-in Premier League-ah match hnih chiah khelh tur an nei tawh a, Champions League khel tura an mamawh zat chu point khat a ni - zanin dar 12:30-ah Chelsea an mikhual dawn.

Blues hian point khat lek pawh an hlawhchhuah chuan pangana Liverpool tan um phak theih an ni tawh dawn lo a, season tharah European club inelna sang ber khel turin an inpettling ang.

Red Devils tan hma hun chinfel hma a finthlak a, FA Cup final-in a la hmuah bawk avangin league match tawp bera Fulham nen an inkhelh huna thapui thawh kher ngai loa khelh theih an duh dawn.

Mahse, zanina an hmachhawn tur hi Chelsea an ni - Frank Lampard-a Chelsea hi tun hma Chelsea ang kha ni tawh lo mah se, London club hmachhawn hi thil châkawm a la ni chuang lo.

Hna thawk ang!

United manager Erik ten Hag chuan an hna hmasa tur chu hnehna chan phawt a nih thu sawiin, Champions League khelh ngei a tum. Dutch coach chuan, "A hmasa berah chuan hnehna chan phawt a, kan hna kan hlen a ṭul.

"Chumi zawhah chuan midangin kan khelh dan eng angin nge an hmuh, kan ngaihtuah chauh ang," a ti a, an hna hmasa ber chu Chelsea laka hnehna chan a nih thu a sawi.

Ten Hag chuan Champions League khelh ngei an duh thu sawiin, "Team ṭha ber berte nena inel kan duh a, chutiang ti tur chuan Champions League khelh a ngai a ni. Premier League-ah chuan hna a awlsam ṭhin lo.

"Team tam takin a sang pali zinga tel an duh avangin kalkawng a hautak a, team tam takin CL khelh an beisei ṭhin - chutianga beiseina nei zinga mi chu kan ni e," a ti a, season tharah chuan European football-a club langsarte nen inel a duh.

Rashford a dam

Marcus Rashford-a'n kar hmasa khan damlohna avangin Bournemouth a hmachhawn thei lo a, tunah erawh training a zawm leh tawh. Ten Hag chuan, "Thawhlehni khan training a zawm ve leh a, a fit pangngai viauin a lang.

"Chutihrual chuan vawiinah kan en chhin leh phawt ang a, eng ang chiahin nge hma a sawn kan thlir ang. Chumi zawhah thutlukna chu kan siam dawn a ni," a ti a, Rashford khelh dawn leh dawn loh a sawi thei lo.

Dutch coach chuan chhuak tur anga sawi Anthony Martial a chhan a, "A awm chuan kan khel ṭha sawt zel a ni," tiin French forward a fak - hetihrual hian Neymar chungchang zawhna erawh a chhang duh lo.

Paris Saint-Germain forward Neymar hi United nen sawizawm an ni a, mahse, Ten Hag chuan, "Chanchinthar kan nei a nih phawt chuan kan hrilh dawn che u nia," tiin press ho zawhna a chhang - Brazil international hi an dawr ngei a ni mai thei.

Chelsea beiseina

Tun season-a Chelsea beisei phak lohzia inhrilh nawn a ngai lo - London club hian an league match hnuhnung pahnihah Manchester United leh Newcastle United an hmachhawn dawn a, khelh chhan dang nei tawh lo mah se mualpho taka season khar loh nan chak an mamawh.

A bik takin coach Frank Lampard-a tan season tawp lam match hniha chak hi a pawimawh - Blues a kir hnua danglamna la thlen thei lo coach hian Red Devils leh Magpies a hneh a nih ngat chuan a hmingchhe lutuk tur a thup ṭhen thei ang.

Hei vang hian player a nih laia Super Frankie an tih ngat hian a hming chhe tawh sa thup mawi a duh dawn a, Old Trafford ngeia United hneh a, Liverpool fan-te beiseina siamsak hi a pawi ti lo ang.

Blues hian team ṭha hneh thei player chu an nei - Thiago Silva, Enzo Fernandez, Joao Felix, Kai Havertz, Raheem Sterling, N'Golo Kanté leh Christian Pulisic te awmna team hi Old Trafford-a point thum beisei turin an squad a chhah ṭha tawk.