Football thiam veng Dinthar an inlan dawn

LBS Suzuki 21st Inter Branch CYMA Football Tournament 2023 chu vawiinah khelh chhunzawm a ni dawn a, football thiam vanga hriat hlawh ṭhin Dinthar Veng chu vawiin hian MFA Ground-ah an inlan dawn - an hmachhawn tur hi Hunthar Veng an ni.

Dinthar hi Mizoram Premier League-a champion hmasa ber Dinthar FC neitu veng an ni a, tualchhung football-ah rei tak ro an lo rel tawh bawk - kum 2000 khan Inter Village Hero Honda Cup-ah champion nomawi chawiin, kum 2002 khan CYMA football-ah an champion leh bawk.

Khatihlaia Dinthar Veng captain Lalhlupuia Sailo leh Abraham Lincoln te kha, tualchhung football ngainatute chuan an theihnghilh lo ang - tun ṭumah erawh player langsar vut sawi tur an awm hran lo a, thawhhona ṭha chu an inchhuanna tur a ni.

Dinthar hi veteran player Samuel Laltlan-thanga leh Lalnunmawia ten an la ho thei dawn a, midfield-ah Churchill Brothers midfielder Lalawmpuia Sailo leh Michael Lalhriatpuia te an inkawp theih chuan tawh an khirh viau ang.

Aizawl khaw pawn aṭanga CYMA Football champion thei Lengpui chuan vawiin hian an khawtualah Chaltlang an hmachhawn dawn.Champion tawh ṭhin Chaltlang hi an match hmasa bera 5-1 a chak thei an nih avangin awlsam taka hneh theih an ni ngawt bik lo ang.

India international hlui Lalchhuanmawia Fanai chuan Lengpui hi a la ho thei dawn a, NE United defender Joe Zoherliana leh Rajasthan United striker F. Lalremsanga te an nei bawk - footballer thiam bik ni ṭhin Rohmingthanga fapa Vanlalṭhazuala a awm bawk. Ani hi MFA Under-15 league khelh zawh takah khan Best Player-ah thlan a ni.