Zaninah Mizoram Football Association Golden Jubilee lawm a ni dawn

Mizoram Football Association chuan zanin hian a kum 50-na, Golden Jubilee chu Vanapa Hall-ah an lawm dawn a, zan dar 8:00-ah hun an hmang ṭan dawn a, AIFF Secretary General Dr Shaji Prabhakaran chu he hun hmkanpui tur hian a lo zin ang.

1973-a din MFA hian zanin hian AIFF hnuaia inelna hrang hranga Mizoram aiawha champion hmasa ber ṭheuhte chawimawina hun an hmang dawn a; India international player hluite chawimawi an nih dawn bakah MFA president lo ni tawhte leh kawng hrang hranga a hmasa berte ṭheuh hnenah chawimawina leh lawmpuina an hlan ang.

MFA team hi kum 2003 khan All India Football Federation hnuaiah a vawi khatna atan a champion a, Lammuala 'kawr sen ha' team kha niin National sub Junior Football Championship-ah an champion a, he mi hnu hian inelna hrang hrangah an lang ve ta zel a ni.

2003 champion team hian India junior international players - Sama Hnamte (L), Tetea Tlau, Zaidinmawia Hmar, Malsawma-te a chher chhuak a ni.

Kum 2012-ah national Junior Championship-ah a vawi khatna atan champion-in tuna ISL star Jerry Mawihmingthanga bakah ISL leh I League player Vanlalbiaa Chhangte, Malsawmzuala, Vanlalduatsanga etc a chher chhuak.

Kum 2014-ah Santosh Trophy-ah an champion a, kum 2015-ah National Games Men's Football-ah champion-in Aizawl FC chu kum 2017-ah I League champion a ni.

Hmeichhe zinga champion hmasa ber chu kum 2015-ah National Girls Sub Junior-a champion team kha niin India junior team-a khel zui ta Grace H Lalrampari, B Vanlalhriattiri-te telna team a ni.

MFA chuan zanina Golden Jubilee lawmnaah hian Mizoram aiawha khel tawh player zawng zawng a sawm a, MFA hruaitu hluite leh referee hluite a sawm bawk a, football inkhawmpui lian hman an tum.

He hun hmang tur hian District Football Association hrang hrang hruaitute chu an lo tel dawn a ni.