Niminah team langsar an chak

LBS Suzuki 21st Inter Branch CYMA Football Tournament 2023 chu khelh chhunzawm zel a ni a, nimina team langsar inlanten hnehna an chang vek - Salem Veng leh Chanmari ten an khingpui lakah goal riat ve ve khungin, hnehna an chang chiang hle.

1st Bn. MAP Ground, Armed Venga inkhelah Salem Vengin Phuldungsei Phul Bial chu 8-0 ngawtin an sawp a, David Lalchhuanawma leh Joseph Lalnunpuia ten hattrick an siam ve ve.

Chanmari tan Jerry Mawi-hmingthanga'n ISL player danglamna a pholang a, Odisha FC forward hian Sakawrtuichhun lakah goal li ngawt khungin, an veng chu 8-0 in a chakpui - Amosa Lalnundanga leh Michael Lalhruaitluanga ten goal hnih ve ve an khung bawk.

K. Lalṭhathanga (Puitea) awmna Bethlehem Vengthlangin Cherhlun laka hnehna chang turin harsatna an tawk lo a, MSSC ground, Lengpuia inkhelah 4-0 in hnehna an chang.

BVT tan K. Lalmalsawma, Hmingthanmawia, Lalmuankima leh Suanngaihmuana ten goal khat ṭheuh an khung. Hetihlai hian tualchhung football-a ngaihven hlawh ṭhin Republic Veng chuan 2-0 in Lamzawl an hneh bawk.

Republic Veng tan minute 30-na lekah Lalawmpuia chuan penalty hmangin goal hmahruai a khung a, an goal hnihna erawh hun pek belha Lalnunzira khung a ni - - Lamzawl tana match hmasa bera goal kua khungtu, Aizawl FC forward R. Lalthanmawia (Amawia) chu Republic defender ṭha Laltluangliana'n a dah ṭha.

Nimin inkhel ngaihven hlawhah ITI Vengin Chhinga Veng meuh hnehtu Zemabawk North an hre lo a, David Lalrinmuana telna team hi 4-2 in an hneh - ITI tan Lalrempuia'n goal hnih a khung a, Edmund Lalrindika leh Joseph Lalvenhima ten an belhchhah bawk.

ITI hian minute 49 chhungin goal li hi an khung a, Zemabawk North tan Lalawmpuia leh Peter Lalrinhlua ten minute 70 hnu lamah goal hnih khung ve leh mah se awmzia a nei phak lo.

Durtlangin match hmasa bera chak chiang tak Zokhawthar an hmachhawn a, Odisha FC midfielder Isaac Vanmalsawma leh Jessy Vanlalmuana te goal hmangin hnehna an chang - 2-0 in an chak.

Kawnpui Jt-in Maite lakah goal sarih zet an khung a, Zohmingsanga'n hattrick a siam - Siphirin 4-2 in Piler an hneh a, Mission Veng pawhin theihna an nei tih pholangin Maubawk chu 3-1 in an hneh ve bawk.