Boston Celtics an la tlawm bik lo!

Game hmasa pathumah chak lo vek mah se Boston Celtics an la tlawm mai bik lo, seeded pahnihna Boston hian nimin zing khan Miami Heat chu 116-99 in an hneh a, beiseina an neih chu an la tinung ve zel - NBA Eastern Conference Finals a la tawp lo.

FTX Arena-a inkhelah Boston Celtics tan Jayson Tatum chuan a mawhphurhna a hlen chhuak, point 33 neiin a team a chakpui - point 17 neitu Jaylen Brown leh Derrick White (16) te an khel ṭha bawk a, an phu ang ngeiin an chak.

Chak lo ni se la chuan Celtics hi zinkawng tawp mai tawh tur an ni. Quarter hmasa berah point rukin an hniam leh nghal a, quarter hnihnaah an intluktawk thung. A hnuhnung pahnihah erawh fal taka kalin khualmualah hnehna an chang.

Celtics guard Marcus Smart chuan, "Tunah chuan match khat chak leh kan tum ang, thui tak sawi lawk theih a ni lo. Inkhel pakhat te tein kan ngaihtuah phawt tur a ni ang," a ti. May 26, Zirtawpni zing hian anmahni khelmualah game 5 an khel dawn.

NBA team zingah hian 3-0 a hnufual hnua tho chhuak leh thei an la awm ngai lo, best of seven series khelh turah hian Boston Celtics tan NBA Finals lut tur chuan thilmak thlen tir a ngai dawn tihna a ni a, hna a hautak dawn hle.

Celtics coach Joe Mazzulla chuan, "Tuna kan rilru puthmang ang bawk hi kan inkhelh leh hunah pawh kan pu tur a ni ang, khelh dan phung pangngai leh a aia ṭha zawk hial pawh kan lantir theih ka beisei," tiin a sawi.

Miami Heat tan Jimmy Butler-a'n point 29 a nei a, ni dang angin a ṭhiante zingah amah thlawptu an ṭha tawk lo - point 20 nei kai thei dang an awm lo. Match hmasa lam an phak lo deuh a, thawhchhuah leh nghal an tum ang.

Butler chuan, "Season tluan chhut chuan playoff chinah kan zavaiin kan khel ṭha vek, hnehna chang leh tur erawh chuan basket venhim lamah kan thawhrim zual a ngai dawn. Bang nghet tak kan din leh a ngai," a ti.

Kum 1999 khan New York Knicks chuan seeded hniam ber ni chungin NBA Finals an lo lut tawh, kuminah hian seeded pariatna Heat hian Knicks sulhnu zui leh theihna remchang an nei, vawi khat chak erawh an la hmabak.

Western Conference lamah Denver Nuggets chuan Los Angeles Lakers hnehin an champion fel tawh. Conference pahnih champion hian NBA Finals 2023 an khel chhunzawm leh dawn a ni.