Arsenal tana rinawm Saka

Buyako Saka chuan a chawr chhuahna Arsenal tan rinawmna thu a ziak thar, kum 2027 thleng cham chhunzawm turin contract a ziak a, inremna an siam thei chu a tan hmasawnna rahbi pawimawh a nih thu a sawi.

England international hi kum 21 mi chauh la ni mah se Gunners tan rinrawl a ni phak tawh. Tun season hman laiah North London club tan goal 14 khungin assist vawi 11 a nei bawk, a thawhhlawk hle.

Arsenal tana match 178 khel tawhtu Saka chuan, "Ka hlim takzet, ka tan chuan Arsenal hi awmna tur hmun dik a ni a, club ṭha leh hma ka sawn zel theihna tura hmun dik chu a ni bawk.

"Ni tin leh kar tin mai hian thil tum leh thlen tum chin ka nei ṭhin a, chumi ka thlen theih nan chuan Arsenal hi ka tan a ṭha ber. Stadium, training ground, coaching staff leh teammate ka nei ṭha hle," a ti.

Saka-a'n contract a neih lai hi kum 2023-24 season thleng daih a ni a, inremna an neih takah chuan amah lo hel leh lak tuma lo dawr tute tan beisei a bo rih ang. Arsenal nen hian February thla kha a thuphung chuan an lo inrem tawh.

Arsenal hian Saka hlawh tur hi chiang takin an tarlang lo - khawthlang media hoin an tarlan dan chuan kar khatah £300,000 vel a hlawh dawn a, an inremna hi kum khatah pound maktaduai 15 bawr vel a tling hial.

Gunners manager Mikel Arteta chuan, "Bukayo hi kan player chhuak thar ṭha berte zinga mi a ni a, ani kan thlungnghet thei hi thil lawmawm tak a ni. A theihna a san bakah midangin an ngainat vek a ni a, hmun pawimawh chan hi a phu," a ti.

Tun season Premier League match 37 an khelh tawh hoah Saka hi a la inlan kim vek. An match hnuhnung berah Wolves an mikhual dawn - Emirates Stadium-a inkhelh turah hian Saka a inlan leh ngei bawk ang.