Manchester City champion kalkawng

Pep Guardiola enkawl Man-chester City chuan a zawna a vawi thum nan Premier League nomawi an chawi a, tun hnaiah Citizens elphak an awm lo tiin a sawi ngam - season an hman chhoh danah thawnthu pawimawh hrang hrang a awm.

Arsenal hmahruaina chu hun pawimawh laiah Man City hian an pawtthla a, inelna boruak a san zawh poh leh a nuam an ti emaw ni tih mai tur a ni. Champions League leh FA Cup final khelh an la hmabak bawk.

Striker Erling Haaland

Borussia Dortmund aṭangin Manchester City-in striker Erling Haaland an lei a, an elpui tura ngaih Liverpool chuan Darwin Nunez an lalut thung, team pahnih hian season khuhhawn nawn Community Shield an inchuh zui.

Reds striker thar Nunez-a'n goal khung nghalin a team chu 3-1 in a chakpui. EPL ṭan hma chawlhkar khat chhung chu Man City striker thar Haaland demna leh beisei a phak loh mai rinna thu chhiar tur a tam hle.

Mahse, season an ṭan ta. West Ham lakah goal khungin 2-0 in an chak nghal, a hnuah Bournemouth lakah khung loin sawisel a hlawh. Amaherawhchu, a zawnin match sarih goal a khung zui a, heng zingah hian a zawna hattrick siam pawh a nei.

Manchester Derby

Sir Alex Ferguson khan 'ṭhenawm bengchheng' tiin Manchester City chanchin a sawi ṭhin a, a nihna takah chuan Manchester United tan City hi el tham an ni vak ngai lo, tunah erawh thawnthu a danglam ta.

Nikum October thlaa Manchester Derby an khelh khan Haaland leh Phil Foden ten hattrick siamin Man City hi 6-3 in an chak. Guardiola naute hian goal thum chhuah mah se, a pawimawh tawh loh hnua goal chhuah an nih avangin awmzia a nei thui lo.

Erik ten Hag-a naute khan beisei an neih san lai takin Man City an ngam lo a, a hnuah Arsenal nen intawngin 3-1 in an chak lo zui - EPL nomawi inchuhna aṭangin United hi season chanve hman hmain an nek chhuak tiin a sawi theih.

KDB-a freekick

October thla an hman ral dawn thleng khan Haaland chu Manchester City tan inkhel zawng zawngah bul ṭantu niin a inlan vek a, inelna hrang hrangah goal 22 tehmeuh a khung fel hman der tawh.

Pep Guardiola-a'n Leicester City lakah Haaland hi a hahchawlhtir a, ani tel lo chuan goal khung an harsat ta tlat. An elpui Arsenal an kaltluan bawk si avangin Man City tan point hloh kha thil pawi a ni.

Goal khung an harsatna inkhelah hian Citizens lamin yard 25-a hlaah freekick an hmu, a pet tura rawn ding chhuak Kevin de Bruyne chuan kum mawi taka rawn khungin a team a chakpui a, an mamawh ang point an hmu.

Haaland-a penalty

Arsenal lamin season bul an ṭan fuh a, champion lai Manchester City tan pawh inthlahdah theih a ni lo. Inthlahdah chu sawi loh chetsual eih chuan nomawi chân mai thei dinhmunah an ding tih an inhrechiang hle bawk.

Fulham nen an inkhel a, minute 26-na lekah Joao Cancelo chu hnawhchhuah a ni. Etihad Stadium-ah a zawna vawi kua zet chak tawh Man City lamin goal khung an harsat zui, an beisei angin an khel chhuak thei lo.

Hun a tawp dawn hnai, minute 90+5-ah De Bruyne chuan penalty a hlawh chhuak - Haaland chuan penalty hi chhuih lutin 2-1 in a team a chakpui a, point hnih hloh thei dinhmuna ding tawh khan a kimin point thum an hmu.

Mahrez-a goal

Kum hlui an hmang liam a, kum thar an chuankai leh meuh pawhin Premier League hmahruaitu chu Arsenal tho an la ni. Gunners ring ngam lotute pawhin North London tan champion kum a ni ve dawn ta niah an ngai ta hial.

January 5 a ni a, Man City chu Chelsea hmachhawn turin Stamford Bridge-ah an lenglut - an chak lo a nih chuan an chunga awm Gunners an phak lohna chu point riat zeta tam a ni thei dawn tih pawh an hrechiang hle.

Pep Guardiola nauten goal khung an harsat, bench aṭangin Jack Grealish leh Riyad Mahrez dah luh an ni. Grealish hian Mahrez goal khung tur a siamsak zui a, khualmualah 1-0 in hnehna an chang.

Arsenal an hneh

Inelna boruak a sang tual tual a, tawnhriat neih a pawimawhzia a lang fiah chho zel. February 15 khan Arsenal tan chuan champion turin an ṭha tawk em, tih fiahna hun a ni, an chak a nih chuan Gunners hi point thuma sang fal tur an ni.

Man City midfielder De Bruyne-a'n laklawh nei miah loa a goal khung chu Bukayo Saka chuan a sutsak a, Arteta naute hian goal phurh hmasak hnuah pawh tho chhuak turin theihna an nei a ni tih an lantir.

Mahse, World Cup hnua khel ṭha em em mai Grealish chuan goal a khung leh ta tlat a, striker Haaaland chuan a khung belh bawk. Emirates Stadium-ah ngei an elpui hi 3-1 in an hneh.

Saliba a inhliam

Arsenal ṭantute hnenah Premier League champion an nih theih loh chhan zawt ta ila, a tam zawk chuan defender pawimawh William Saliba inhliam kha an sawi ngeiin a rinawm - tun thlengin a inkhel thei lo.

France international hi Arteta-a'n a ringtawk a, tlarhnung laiah Gabriel nen an inkawp rem hle. Mahse, March 16 khan Sporting Lisbon nen an inkhelh ṭumin Saliba hian hliam a tuar a, a hnuah defender Takehiro Tomiyasu a inhliam leh bawk.

Anni pahnih an hliam hnuah hian Premier League-ah match sarih chhung chu goal chhuah lohna inkhel an nei zui thei ta lo! May 7 khan Newcastle United chu 2-0 in an hneh ve leh, mahse hetih hunah meuh hi chuan EPL nomawi chu an kuta awm a ni tawh lo.

Goal hnih hum lo

Premier League squad zinga kum naupang ber an ni a, season an hman ṭhat em avangin Arsenal-in fak an hlawh. Inrintawkna sang tak nen Liverpool khelmual an lenglut a, goal hnih an khung hmasa.

Anfield-ah hian kum 2012 hnu lamah chak ni hmel an la hmu lo, an sulhnu duhawm lo tak hi thai boin hnehna hlado an chham ngei dawn pawh niin a lang a, goal engzat tak khung belh leh ang maw tih chu inkhel entute zawhna inzawh a ni.

Mahse, minute 28 lekah 2-0 a hmahruai hman si kha hun a tawp meuh chuan 2-2 in an inhnehtawk. Man City aia match an la khelh tam avangin Arteta naute hi Premier League hmahruaitu erawh an la ni chhunzawm.

Saka penalty hlah

Liverpool lakah goal hnih an hum thei lo a, thil mak a ni. West Ham lakah Gabriel Jesus leh Martin Odegaard te goal hmangin minute 10 lekah 2-0 in hma an hruai leh hman, an khelh dan en chuan an khung belh nual pawh a rinawm.

Hammers lamin Said Benrahma-a penalty hmangin si phurh an sut ṭhen. Arsenal dinhmun a la ṭha zawk tho, an hmahruaina belhchah turin penalty an hmu zui a, a pet turin Bukayo Saka a rawn ding chhuak.

Mahse, Saka-a'n penalty hi a hlah, goal zawnah a pet lo. A hnu lawkah West Ham lamin Jarrod Bowen hmangin si phurh an sut lo, minute 54-naah 2-2 a ni a, a hnu lamah goal dang an khung belh thei tawh chuang lo.

Man City an chungnung

April thla an hman chhiat em avangin Arsenal beiseina chu a thamral tawh tluk a ni a, mahse beiseina thamral erawh a la ni bik lo - a chhan chu Manchester City khelmual Etihad Stadium-a an la lenluh dawn vang a ni.

Etihad Stadium-ah hian chak ni se la chuan Arsenal hian champion beiseina sang tak an la nei thei a, inkhelh hmain Pep Guardiola chuan 'Premier League Final' tih hialin a sawi a nih kha, inkhel pawimawh bik an hmachhawn.

Minute riatna lekah De Bruyne-a'n goal a khung ṭan a, zawimuangin Arsenal beiseina a thamral - a tawpah Citizens hian 4-1 a hnehna changin inkhel pawimawhah an elpui ber an sawp thei a, an phu ang ngeiin Premier League nomawi an chawi chhunzawm bawk.